Thaal ruah a suur hlei lo ca ah Thantlang Peng khuate cheukhat tlanglo tuah mi lungrethei-2021 April 28 tiang ah thaal ruah voi khat hmanh a suur lo ca ah tlanglo tuah in paw aa cawm mi Thantlang Peng khuate cheukhat lungrethei in an um, tiah kan theih. “Nikhua kong cu aho nih kan hngal lo nain kumdang tawn ahcun atu tik ah hin ruahti a tla cang. Facang siseh, kawm (fangvoi) siseh, thlai dangdang zong kan ciinthlak dih tawn caan a si cang. Tukum tu cu ruahpi a suur bak lo ca ah thlai a thlacia he a thla rih lo mi he kan lungrethei ko,” tiah Vailam Tlang khua pakhat in khuami pakhat nih The Hakha Times ah a chim.
Hi kong ah Zahnak Tlang khua pakhat in khuami pakhat nih, “Kanmah khua lawng si loin kannih tlang hi leikuang (neel) a tuah mi hi cheuthum ah cheukhat hrawng lawng an si. Dumhau ngaingai in paw aa cawm mi kan um lo. Tlanglo bak hi kan pawcawmnak a si. Thaal ruah a suur lo tik ah kumpi kum khat chung kan pawcawmnak a vun hnursuan manh tluk khi a si. Lungrethei ngai a si ko. Kan nikhua rengreng hi kumdang nakin a linsa khun mi alo,” tiah The Hakha Times ah a chim.
“Kannih khua hi ruahpi suur cu kan hngak i zatuak in zatceo deng nih thlai an thlak cang nain a tam-u cu kan thla rih lo. Thlaithlacia mi zong cu vawlei a hak tuk i a khur fel tein cawhpiak i nawh (phum) khawh tung lo ahcun zuuva nih an char fawn. Ruahti tlak a hngak mi nihle zeican suur loin a um lai aa hngalh lo tik ah a tlol (kan tlolh) sual kho ve. Thial lengmang mi tlanglo theo hi zapi zaraan kan pawcawmnak a si fawn i lungrethei kan si ko,” tiah Vanzang Tlang khua pakhat in khuami pakhat nih The Hakha Times ah a chim.
Chinram ah hin thial lengmang mi tlanglo tuah in paw aa cawm mi tam deuh hi Thantlang Peng le Tedim Peng an si, ti a si nain Thantlang Peng hi an tam bik. Thaal ruah a suur rih lo ca ah kumpi kum khat chung an pawcawmnak kong ah lungrethei in an um, tiah kan theih.crd: The Hakha Times
Leave a Reply