Leiba A Cham Lomi CDM Tuahtu Hna Cu Ralhrangbu Nih Dantat An Timh Hna

Hramhram in nawlngeihnak latu ralhrangbu nih cozah tangka cawihmi cham loin CDM a tuahmi hna cu rampi tangka a diklo ningin an hman tiin tazacuai le dantatnak tuah a timh hna tiah Non-CDM hna nih an chim.

Cozah tangka cawihmi timi hi NLD cozah chan ah covid-19 zawtnak ruangah harnak a tongmi cozah riantuantu hna cu a karh um loin thlahnih thlahlaw cu a rak cawih hna. Cu tangka cu cham loin CDM a tuahmi hna cu rampi tangka a diklo ningin an hman tiah dantat dingin ralhrangbu nih cazin an lak cuahmah cang tiah Non-CDM hna chimnak in theih a si.

CDM tuahtu pakhat nih cun “Atu tiangah leiba cham u tiah ca pek a um rih lo, leiba cawhnak ca an kan pek zongah kan cham hlei lai lo” tiah a chim. 

Non-CDM pakhat nih cun “CDM tuahtu hna cu leiba an cham lo tiin dantatnak lam pakhat khat an kawl khi a si ko. Atu hi CDM tuahtu hna cazin an kan hal cang. An chimning ah cun cheukhat cu pohmah 505 in tazacuai an timh hna, cheukhat cu rampi tangka a diklo in an hman tiin dantatnak tuah an timh cuahmah tiah kan theih” tiah a chim ve. 

Ralhrangbu nih cun CDM a tuah nain zung a kai thanmi hna cu October thla dih thok in leiba chamnak caah thla tin tein an thlahlawh an cik piak hna. Asinain leiba cham loin CDM a tuahmi an tampi caah cu hna cu dantat dingin ralhrangbu nih an i timhmi a si. 

NLD cozah chan ah cozah riantuan hna dawtnak le zawnruahnak he thlahnih thlahlawh a karh um loin an rak cawihmi hna cu ralhrangbu nih hmuh than an i zuam lengmang nain NUG cozah nih cun cham a hau lo, kan in dawt hna tiah kan hnulei ah an rak thanh cang. #Than Lwin Times

The Chin Post