Rallokap nih fawi tein lamzawhnak hruaitu le mipi thazaang petu, forhfialtu an tlaih lengmangnak a ruang cu leirawitu (dalan) an um caah a si. Leirawitu hna hi mi sawhsawh bantuk tein mipi lakah an um, an thudir, an tlongleng. Cuticun mipi cawlcanghning, timtuahmi, ahodah hruaitu a si, ahonihdah a forhfial hna ti bantukin kha hmanthlak he cazin an lak, cucu rallokap sinah an pek. Cutikah rallokap nih fawi tein an tlaih khawh lengmang hna.
CDM ah aa telmi palik nih cun leirawitu tam deuh cu USDP chungtel an si tiah a chim. Kan theih bantukin USDP cu rallokap kut tangah a ummi party a si. Rallokap firkhu rual nih an dirhmi a si fawn. Rallokap nih cun USDP hmangin rampi uktu, nawlngeitu si an i zuam peng. Ramkhel ah party in uktu an si khawh lo caah atu bantukin nawlngeihnak an lak hi a si.
“Mi sawhsawh zong leirawitu an si kho ko nain USDP cu rallokap kut tangah a ummi a si. Pehtlaihnak an ngei peng i thawngpang i pekchanh a fawi tuk” tiah ramri ah a zammi palik pakhat nih Myanmar Now ah a chim.
Rangon i rallokap dohdalnak ah biatak tein a cawlcangmi pakhat nih cun “Kan inn ahhin tlanglawng riantuantu CDM a tuahmi hna an ra tawn i kan veng chungah leirawitu an um caah voihnih kan i thial. Thawngpang a petu hi veng uktu hna zong an i tel, a biapi cun USDP an si. USDP minung an tam tuk” tiah a chim ve.
Leirawitu a si tiah fiangtein theihmi cu an lu an kawngh hna, an hmaiah leirawitu ka si timi ca an tial hna, inn an khangh piakmi hna zong an um. Bomb in maw, meithal in maw, nam in maw thahmi zong an um len cang.
Leirawitu si hi tih a nung tuk, fih a nung tukmi zong a si. Mipi lei lawngin a si lo. Anmah a hmangtu rallokap lila zong nih chuih le bengh, vuak le thah tiang an tong kho ve. Rallokap nih cun aho zawn hmanh an ruat bal lo. An duh lo ningin bia a chimtu, thil a tuah sualtu poah cu fawi tein an tlaih hna, an thah mai ko hna.
Nihin hi leirawitu si ruangah rallokap sin in tangka, chawva, dirhmun tha a hmumi hna hi an i lawmh caan le lunghmuih caan a sau lai lo. Nikhat caan khat ah cun mipi kut an tuar hrimhrim lai, rallokap kut lila zong an tuar te lai.
Mahca cun……!
1 Chin miphun chung zongah USDP chungtel, MAH sinah a tangmi rallokap nupi, fanu fapa an um len ve caah mipi i ralring usih. Ram a buai hlan tein anih hi cu USDP a si, anih cu rallokap nupi, fanu le fapa a si, asiloah rallokap he aa naihniammi, hawikomtha an si tiah theihmi hna cu a thli tein dothlat ding, ngiatthlai ding an si. Leirawitu an si le si lo fiangin theih a herh.
2Dinnak a tanhmi, a aupimi hna leirawltu hi cu si hram hlah usihlaw a tha bik ko nain….nihin i leirawitu kan sinak hi nun chung lawng hmanh si loin techin fapar chan tiangi
Credit The Chin Post
Leave a Reply