CDM Tuah Ruang ah Ralkap nih an Tlaihmi Pa a Nunnak a Liam-Monywa khua i thingram lei zung ah rian a ttuanmi Ko Tun Htet Aung cu March 15 ah ralkap nih an tlaih i, a nunnak a liam tiah chungkhar thawng an thanh hna.Chungkhar nih a ruak vui ding in an vung lak tik ah cun a takpum le a hmai ah tukvelhnak hmaneh lawngte in a khat.The Chin Journal;March 17, Yangon(VOM).
Thawngpang dang relchap; “arthur;ka si kho hrimhrim lo, ka si kho lo kal asi ko”by C Duh Kam-Tu chun cu kan miphun sin ah a hmasabik American Baptist siangbawi nuva Rev. Arthur le Mrs. Laura Carson cu Hakha khua ah an phak ni, kum 122nak camtuak a si. Chinram fing le tlang aa dawh saling te March 15, 1899 ni ah an phan. Siangbawinu Laura cu Lairam dawhnak nih a hnem kho lo.
“Arthur, ka si kho hrimhrim lo, ka si kho lo bak a si ko,” tiah mitthli tla in a ṭap ruangmang. Siangbawipa Arthur cu Chinram ah kum 9 rian a ṭuan hnu ah April 1, 1908 ni ah rilfonghlei damlonak in a thi tuan i, siangbawinu cu ngaihchiatnak mitthli he Hakha khua ah Khrih rian cu October 1920 tiang a ṭuan. November 4, 1920 ni ah Kawlram in USA ah a tlung. July 19, 1942 ni ah vawlei cu kaltaak in a rian a ṭuanpiakmi Khrih remhmi vanram nuam ah, Hakha khua in a tlun lai ah a thlan ro te kaltaak a sian lo mi siangbawipa Arthur sin ah aa din ve.
Kum 21 le thla 7 chung Khrih rian a ṭuanpiak mi hna Chin/Laimi hna kaltaak lai cu a rak ruat kho lo.Tuanbia cio cio ah Khrih caah nunnak aa pe i fihnung teufiak santlai lo miphun dang caah nunnak thinlung dihlak in rianṭuannak tuanbia cu aa dawh khun a rak si. Chin/Lairam ah an tuhmi Khrih Thawngṭha thlaici cu a keu i thing hmawng tang ah khua a sami Hakha khua le Lairam cu inn dawh dawh in a khat cang. An chuahkehnak US ram ah Chin/Laimi chungkhar tampi khua kan sa kho hna. Siangbawi nulepa an i lawmhnak van sui mitthli cu a luang thliahmah tawn ko lai.
Tulio belte ah Bawipa Pathian serpiakmi dinnak, daihnak le zalawnnak hmuh awk caah Kawlram le Chinram ah meithal le bom khu tang ah ralkap duhlonak a langhtermi kan miphun hawi vialte hna an hmuh lai i siangbawi nulepa rauthla nih cun tuar har tuk in an tem ve ko lai. Vawlei hi cu Bawi Khrih lo cun duh a tling hrim lo mu!Pathian Bawipa, kan miphun hawi hna hi kuan fang lak in kilveng ko hna. Na daihnak, dawtnak, le dinnak cu kan Kawlram le Chinram ah len ter ko cang. Chungkhar kip ah na vel le zangfahnak hi tlunter law thluachuah kan pe cio ko tiin zangfah kan hal. Amen.15 March 2021, Monday.
Leave a Reply