Mizoram Ah Internet Hmang In Sualnak A Karh Covid-19 zawtnak ruangah i erhkhumh chungah internet hmang in sualnak za ah 60 in a karh tiah Mizoram Police nih an chim.
Hi kong he pehtlaih in cathanhnak nih- covid-19 zawtnak nih minung khuasak tintuk tampi a thlen.Duh ningin leng chuah le lenkai a ngah lo caah mi tampi nih mi an herhbau mi cu online in an cah.
Cheukhat nih social media cu umhar phennak le caan thlaunak caah hman a si mi nih mi hlen hmang mi le fir a duh mi caah cawlcanghnak a fawi ter i, a tam ter hlei ah misual pawl hna cawlcangh ning zong tampi a thlen ter tiah a ti.
Police hna chim ningah tukum 2021 January thla in June thla chungah Cyber Crime Police Station, Aizawl ah internet hmang in sualnak tuah mi F.I.R 163 a lut.Mah hi nikum 2020 he tahchunh ahcun za ah 60 in a karh.
Mah FIR a lut mi chungin za ah 71% hi internet hmang in tangka/phaisa i hlennak a si. Za ah 17% cu internet hman in nupa sualnak hoih in i hlennak le i lem nak a si.
A tang mi 12% hi pumpak fir piak, social media hmangin nupa sualnak tuah hnu ah mualpho ter/mualpho dingah thihphaihnak le copyright phung buar hna a si.
IT chan a si bantukin mi vialte nih internet, social media loin kan um kho ti lo.Cucaah, mi kip nih mah bantuk sualnak lakah kan him khawhnak caah a biapi mi pumpak thil/kong hna cu internet hmang in pek lo dingin Mizoram Police hruaitu hna nih mipi an nawl.
The Chin Post
Leave a Reply