India ram, Mizoram state, Saiha district chung ah Assam Rifle ralkap phu nih bomb tampi an tlaih ti a si. Kanmah Chin ralkap hna thilri a si hnga maw timi phan a um ngai ko. Cu bomb thilri an tlaihmi kong he pehtlaih in The Chin Journal nih a tanglei bantukin a tarlangh. “Mizoram, Saiha District chung ah Assam Rifle ralkap bu nih bomb tampi an tlaih tthan, tiah thawng an chuah.”
“Bomb an tlaihnak hmun hi Saiha District chung i ramri khuate Zawngling khua pawng ah a si. Assam Rifle ralkap bu nih Truck Motor pakhat an kham i bomb tampi an phorhmi an hmuh hi a si. Bomb a phortu minung pathum zong an tliah hna. Kan hnu December 31 zong ah khan Saiha District, Mawhre khuate pawng ah Bomb sernak thilri le meithal kuan tampi an rak tlaih cang” tiah a tarlangh hi a si. Credit: The Chin Journal
Thawngpangdang: Kalay myo le Chin ramkulh pehtlaihnak motor lam in a rak ra i Hiang Zing khua ah hmunhma a khuarmi SAC ralhrang phu hna cu CDM Siyin, PDF Zoland, Kalay PDF 3 , Kalay PDF 8, Kalay PDF 9, PDA,Zongam Army, CDF KKG-2 ti bantuk Chin ralkap phu fonh nih nihin January 21, zinglei suimilam 1:45 hrawn gah an kah i a tlawmbik ralhrang 15 an thi pinah,
Tampi nih hliamhma an tuar ti si. Chin ralkap phu fonh lei in pasaltha 2 nih hliamhma an tuar ve” tiah Civid Defense Militia (CDM- Siyin) nih a thawngthanhnak an tuah ve hi a si. Hiang Zing khua ah a um ralhrang hna hi January 12 lio ah Kalay in Chinram mipi ralkap pawl doh awk ah thlah mi an si hna. Minung 100 hrawng thlah mi an rak si.
Asinain hmai kal kho ti loin minung 50 hrawng lawng an um hi a si. Hi hmun ahhin January 13 thok in i kahdohnak a um lengmang cang i, ralhrang nih raltuknak vanlawng zong an rak hman. Kalay University ah a ummi ralhrang phu nih tuzing ah Hiang zing khua lei Chin ralkap pawl an um lai tiah an ruahnak hmun ah miakpi in an hung kah ve ti zong in theih a si. Source: CDM Siyin
Leave a Reply