US President hlun Barrak Obama nih cun April 26 ah Myanmar buainak kongah cathanh pakhat a chuah. Cu a cathanh ah cun “Atu cu muihnak a tlun lio a si. Asinain lungrual tein nan um i democracy phungningin fek tein nan dir i nan cawlcangh a si ahcun Myanmar mipi hna aunak aw a thei i a ngaitu vawleicung hruaitu hna sinin Myanmar mipi nan caah ruahchannak niceu a chuak ko lai” tiah Obama nih a tial.
Cu lawng si loin mipi hna duhnak a langhtertu rampi huap cawlcanghnak le sualnak ngei lo mipi cung i sersatnak a tlungmi ruangah tuksaphur in ka um, hi bantuk a tongmi Myanmar ram hi vawleipi nih mitthep loin a zoh peng ko. Kum 10 chung a sunglawi tukmi zalonnak hmuh hnuah ralkap nih anmah duhning in ram an uk khawhnak dingah phungning lo le ruru hranghrang in an i zuamnak cu Myanmar mipi nih zeitihmanh in an cohlang kho lai lo. Cu bantukin vawleicung ram vialte zong nih cohlan ding a si lo. President Biden he lungthin aa khatmi ram hna nih ralkap hna cung i dantatnak an tuahmi le democracy a um than khawh nak dingah an i zuamnak cu ka lungtling tuk, tiah Barrak Obama nih a cathanh ah a tial.
Cu pinah Myanmar innpa ram a simi hna nih mipi duhnak kha hnon in mithat lainawng a simi ralkap cozah nan cohlanmi cu buainak nganpi le rampi sifahnak chuahtertu lawng a si lai tiah ralrin peknak zong a tial chih.
Obama nih Myanmar innpa ram hna a timi hi China le ASEAN ram hna an si lai tiah zumhnak a um.
Myanmar ah a dikmi democracy a um khawhnak hnga aa zuammi hna nih aa khat lomi miphun le biaknak karlak ah lungrualnak nan ser khawh peng a hau tiah Obama nih cun a tial.
US President a si cangmi cu President an si ti lo hnu zongah zeimawzat huham an ngei rih. Barrak Obama lebang hi cu atu US President Biden hnulei in a dirkamhtu, ruahnak a petu a si. Biden zong nih tampi aa bochanmi a si caah Obama nih Myanmar kongah atu bantukin cathanh a chuahmi cu Myanmar mipi caah santlaihnak a um khomi a si.
Credit The Chin Post
Leave a Reply