Ramchung ralthawh (Civilwar) le mangttam hi aa zul pengmi a si,civilwar taktak kan luh hlan hmanhah kawlrawn leiah eiawk ngei lo 20% tluk deng an si manh cang caah ralpi taktak kan luh cun 60% hi eidin awk ngei lo kan site kho.
Chin miphun cu tlawmngai mi miphun,tlangzam ahmangmi,sa aa hlehmi miphun, innpa chakthlang aa lengkai le harsa hna a zuanhnawh le bawmchan mi miphun kan kokek nungziamawi kha tu kan boruak ah atakin langh ter cio hna usih.
Sazam tam deuh kan tlunpi hmanhah mah chungkhar lawng eika thaw lo,innpa ahleh le cheubau siangmi miphun kan nunphung kha fekte in itlaih le langhter peng rih usih.
Tulio Chinmi kan dirhmun ahcun kan ngeihmi a bikin eidin tirawl kha anei ve lo mi sinah cheuhbauh le pek/tthenh ve ding dirhmunah kan dir,cucu Pathian duhmi le Bible nih a kan cawnpiakmi zong a si.Civilwar aa thawh hnik cang, tuhnu pinlei khin civilwar taktak cu a chuak te lai caah abikin eidin leiah harnak tampi kan tong te hna lai.
Chinmi cu pumkhat kan si btk in ralthawh lio tal ahcun kan ngeihmi chunte kha a ngei ve lo mi sinah pek sian ve le I cheuhbauh cio haumi a si. Chawdawr tuahmi hna nih ralthawh harsat ruangah na chawdawr thilman kha alet 2/3 in caanrem la in kai ter hrimhrim lai cih. Na dawr thil man mahti na kai ter ahcun Dalan,laante na si tinak. Na chawdawr kha a zatawk tein ahlep tuahte,caanrem lak riangmang in alet in kaiter hlah.
Na chungkhar pi lawng nih pawkhim te in eiding peng law,na pawngkam eidin awk ngei ve lo hna rawlttam tihal in an um na hmu ko nain na pek sian ve lo cun,na thih hlanlo mah cucu na mitthlamah a cuang peng lai,na lungrethei ziar peng lai tinak si.
Tangka na ngeihchun mi kha angeilo coih caan a si,eidin na ngeihmi te kha a ngei ve lo mi pek/tthenh caan a si,ralthawh lio caan talah cun kan pianthar man langhter hram usih. Mahpi lawng puar kengkung in ei,midang ttam hnianghnuang in umter loding,facang dip khat kan ngeih cun dip tan pek sian ding si.Cucu Chin miphun kan kokek in rak kalpi mi kan nunziamawi asi peng.
Ram 3nk ummi hna nih na chungkhar ca alwng ruat hlah,na chungkhar na chawnh le tangka na kuat pah tikah tihin hal chih tehna”ka chung le hna,kan innpa le kan khua hna eidin leiah hodah a ttamhal”kan kuatmi tangka hi aherh ningin rak cheubau vete hna ulaw”timi caan ah kan dir kha philh hlah usih.
Tulio kan caan hi duhfah hauk-kauh le a miakmai hmuh itimhnak caan a silo,ngeihchun mi tete I cheuhbauh caan si,aa daw lole aa rak i ralmi hna idawt caan,irem caan zong a si. Tuan lio kan rak isiknak le remlonak kan sining hna kal takin pakhatah dirin ifuntom caan,tlengkhatah tthutti in tuanzai rel tti caan a si. Cred : Chinland 7 Post
Leave a Reply