Nankha ah vanlawng in bomb hmang in an kah hna caah nunnak liammi PDF ralkap 8 nihin an ruak khangh an si

Nankha khua ah ralhrang nih vanlawng in bomb hmang in an kah hna caah nunnak liammi PDF ralkap 9 cu nihin zaanlei ah an ruak khangh in an vui hna tiah Gangaw Battalion PDF sinin theih asi.

Gangaw peng, Nankha khua December 17 ah BG-PDF le adang PDF tonpumhnak an tuah lio ah ralhrang nih cunglei in bomb in an kah hna hlei ah hriamhme in an kah i nunnak liammi hna cu mei in an ruak an khangh vui hna.

Relchap : Lyi Kih Kaw Khua Thar Ah SAC Ralhrang Ralkap Le KNLA Le PDF Fonhmi Phu Karlak Ah Kahdohnak A Fak Ngaingai

Nawlngeihnak latu SAC ralhrang ralkap hna nih ramri lonh in an cawlcanghnak ruangah kahdohnak cu a fak ngaingai cang caah khuapi chung khuasami mipi hna nih an zaam takmi Lyi Kih Kaw Khuapi Thar cu kum 2021 Dec 19 ah KNLA kuttang ah a um cang nain atu ahcun kahdohnak hi a fak ngaingai than cang tiah KNLA lei sinin thawng theih a si.

Lyi Kih Kaw Khuapi Thar cu raldohnak lei dirhmun in cun teinak asiloah kan kuttang ah a um cang ko nain Myittar Linmyine le Kyaukh Lung Gyi leikap ah a ummi SAC ralhrang ralkap leikap nih hriamngan hmangin an kan kah caah mipi hna nih khuapi chungah lut in khuasa awk a tha rih lo i, tuzing zongah khan kaphnih leiah fak ngaingai in kahdohnak a chuak than tiah KNLA leikap sinin thawng theih a si.

Nawlngeihnak latu SAC ralhrang ralkap rual cu an thazaang an i chap than caah kum 2021 Dec 15 thawkin cun Lyi Kih Kaw hmunhma chungah kahdohnak a chuak cang i, mipi hna cu ralzaam dirhnun in an um cang hna caah minung umlonak inn chungin Sui, Tangka, le thil dang man ngeimi paohpaoh cu SAC ralhrang ralkap rual nih an laak piak hna tiah thawng theih a si.

Cu kahdohnak ruagah Lyi Kih Kaw le pawngkam khuami mipi hna cu himnak hmun ah siseh Thailand ram chung leiah siseh an zaam cio hna caah ralzaam minung 8000 lengkai an phan cang tiah thawng theih a si. Credit : The Federal Times