Nihin SAC ralhrang nih Thantlang inn khanghmi ah Rev. Neely Laiuk te inn zong aa tel ve. Cu kong he pehtlaih in Rev. Neely Laiuk nih a social media ah a tanglei bantukin a tarlangh. “Nihin cu kan caan a hong phan ve ruangmang. Ram le miphun thlennak caah Bawipa nih kan inn a hman ve tiin thazaang lak kan i zuam. Kan nunnak le zeizong te hi Bawipa ta an si dih ko.”
“Bawipa lam hruainak cu a palh bal lo. A kaangmi inn cu kan hmu than ti lai lo nain Pathian hmuitinh tu cu cho kan chuah cun fiang tein kan hmuh khawh te ko lai. Bawipa sunparnak caah si ko seh” tiah tiah a tarlangh hi a si. Tu lio Thantlang meikhanghnak kong he pehtlaih in Lai media hna nih an tarlanghmi a tanglei ah rel chih khawh a si. Credit: Neely Laiuk
Breaking News Rel chap ding: Nihin January 3, zanlei suimilam 3:30 hrawng ah Thantlang khua chung Sianginn sang, Khuafo lam lei inn hna cu ralhrang phu nih mei an khangh than tiah theih a si. Inn zeizat a kangh cu theih a si rih lo tiah The Chin Post media nih a tarlangh.
The Chin Journal zong nih “Nihin January 3 chunhnu hrawng in Thantlang khua ah meikanghnak a chuak tthan i meikhu tompi zong a langtlang in an hmuh. A tanglei hmanthlak pawl hi nihin chunhnu 2:30 hrawng ah Thantlang he meng 30 hrawng a hlatnak Hriphi in an hmuhmi meikhu an si” tiah a tarlangh ve.
Thantlang khuapi cu SAC ralhrang nih voi tampi an khangh cang hna. Nai December 31 ni zong ah khan inn 4 an rak khangh rih hna. Thantlang Placement Affairs Committee -IDPs Help nih December 31 ni ah SAC ralhrang nih Thantlang khuami inn an khanghmi zat le inn ngeitu hna min cazin cu a tanglei bantukin a langhter ve.
“December 31 ni Thantlang khua ah inn 4 a kang chap tthan. A tang lei ah kanghuhnak a tongmi hna kan van langh ter. 1. Pu Bawi Awi (Sianginn Sang), 2. Pu Sui Uk (Sianginn Sang), 3. Pu Chim Thang (Sianginn Sang), le 4. Pu Pu Uk (Sianginn Sang), an dihlak inn 4” tiah a tarlangh hi a si. Ref: TCP, TCJ, TPAC.
Leave a Reply