India ram Odhisa, Rayagada district chung a ummi khua 3 in minung 50 leng cu zumlo tu pawl nih an thihphaih hna caah khuachungah um ngam ti lo in umnak le eidin zong thathi ngei lo in ramtang ah an zaam tiah theih asi.
Hi kong he pehtlaih in Sikarpai khuami Nori Kanjaka nih “furpi lio asi, ramtang ah i dornak tha zong an ngeih lo caah thlichia, ruahpi lakah an ngandamnak ca zong phan an um ngai” tiin an dirhmun a chim.
Kotlang khua in chungkhar 6 hna cu Krihfa an si caah zumlo tu hna nih an inn an hrawh piak hna, an velh hna, an thil zong an chuh hna hnuah khuachungah um lo dingin an thawl hna caah June ni 7 ah khan an khua in meng 20 a hlatnak hmunah an zaam cang.
Khua dang hna zong nih hi thawng an theih i an khua ah a ummi Krihfa hna cu an thawl ve hna. An chuah khawhnak lam poh in a phunphun in an thawl hna. Chichinga khua ah a ummi inn dong,2 zong an thawl ve hna.
Atu ah cu ka hmun ah a ummi hi chungkhar 8 nunau le hngakchia he 57 cu umhmun thathi ngei lo in ramtang ah an um rih ko tiah Kanjaka nih a ti.
Pastor Upajukta Singh nihcun Sikarpai, Kotlanga, Chichinga pin ah Rayagada district chungah a um ve mi Siripai, Kona le Tongapai zumlo bu hna thihphaihnak le dohnak tampi an tong tiah a chim.
The Chin Post
Leave a Reply