Nihin Ah Pasaltha Henry Ruak Thlaknak An Tuah: Rest In Peace

December 31 ni i Demawso kahdohnak ah ram le miphun caah a nunnak a pemi KNDF ralkap, pasaltha Henry ruak cu nihin ah thlahnak tuah a si. Thil sining cu, Karenni ramkulh, Demawso myone chung ah December 31 ni kahdohnak ah hliamhma tuar in sii aa thlawp i, nizan January 2 ni ah a nunnak a liammi Karenni National Defense Force (KNDF) ralkap phu chungtel pasaltha Henry ruak thlahnak cu,

Nihin ah KNDF nih an tuah piak hna tiah theih a si. Pasaltha Henry cu SAC ralhrang duhlonak langhternak, daihnak le Federal Democracy ngah khawhnak caah duhlonak langhternak ah lung tho tein a rak i tel ve tawnmi siangngakchia pakhat zong a si tiah theih a si. December 31 ni thok in nihin January 3 ni tiang Demawso myone, Ngwetaungse pawng ah,

SAC ralhrang phu le Karenni hriamtlai phu fonh hna kar kahdohnak pehzulh in a um i nizan kahdohnak ah Loikaw PDF chungtel pakhat le Karenni Army chungtel pakhat an nunnak a liam tiah theih a si. SAC ralhrang phu nih hramhram in uknak an lak hnu ah Karenni ramkulh chung ah kahdohnak voi 130 leng a chuah cang i,

Karenni hriamtlai phu dihlak chung in 44 nih ram le miphun caah an nunnak an pek cang hna tiah theih a si. Cun Karenni hriamtlai phufonh le SAC ralhrang phu kar kahdohnak ruangah SAC ralhrang phu lei in ralhrang 500 leng an thi ve cang tiah Progressive Karenni People’s Force (PKPF) phu nih cazin an lak mi ning in theih a si. Ref: KTM

Thawngpang dang: Monywa myone chung Mytel Tower he aa pehtlaihmi thilri pawl cu Local PDF phu nih an hrawk hna: Sagaing ramthen, Monywa myoe, Htanaungtaw, Pauktaw, Tawpu, Kyapaing khua hna kar ah a ummi SAC ralhrang Min Aung Hlaing chungkhar ngeihmi Mytel pehtlaihnak Tower he aa pehtlaihmi thilri pawl cu January 2 ni, zanlei sang ah local PDF phu a simi,

Black Wolf Defense Force, Monywa Lightening PDF, Chaung U Local Defense Force, Chaung U Revolution Army, Farmers Revolution Force, CHU, Bo Mo Kyo te phu, Monywa Underground Revolution, Black Eagle People’s Defense Force phu hna nih an hrawk hna tiah theih a si. Cu PDF phu fonh hna cu khondennak um hraw loin tluang tein hnu an tolh kho tiah Monywa Lightening PDF phu nih thawngthanhnak an tuah hi a si. Ref: KTM