Chin ramkulh, Falam peng, Meihol khua pawng ah Chin ralkap CNDF bomb an tuarmi cu nihin January 12 ni, zinglei suimilam 10 hrawng ah SAC ralhrang phu hna nih an i pah cang i bomb 10 ning in a puah hnawh hna tiah theih a si. Cu caah SAC ralhrang phu hna nih hriamnam nga he voi 20 leng pi an kah i Seh meithal zong in an pawngkam ah an kah sawhsawh hna tiah theih a si.
Cu bomb puah hnawh nak ah SAC ralhrang lei in a thimi le hliamtuar zat theih fian a si rih lo. SAC ralhrang phu thazaang 100 leng cu Kalay myone Natchaung khua in Chin ramkulh, Waibulah khuapi lei ah ral doh ding in an rak kai hi a si. January 10 ni zong ah Waibulah khuapi pawng ah CNDF nih bomb an tarmi cu SAC ralhrang phu nih an i lam sual i tam nawn an thi rih hna.
Kalay myo lei in a rak kaimi SAC ralhrang phu motor run cu an kar lak ah inn cit motor pawl an chiah i an rak kai hna tiah theih a si. Kalay myo in nihin January 12 ni, zinglei sang ah a rak kaimi SAC ralhrang phu motor run cu an kar lak ah inn cit motor tete chiah i an rak kai hna tiah theih a si. Hmai bik ah SAC ralhrang motor hme pakhat a kai i, a hnu ah truck motor hna, inn cit motor hna an kalter hna.
Cu hnu ah SAC ralhrang pawl motor nih a zul hna. Tuzing ah 9 Miles gate ah mipi khual tlawngmi pawl an dirter dih hna i atu bantukin an kar lakah i tenh in Laitlang lei an kai hi a si. SAC ralhrang phu motor in 5 in 9 kar hrawng an si tiah theih a si. Cucaah a cheu inn cit motor le khualtlawngmi hna cu 9 Miles in Kalay myo lei an kir than hna.
Tu zan cu Tedim myone, Tai nyin khua thlang ah zan an riah lai tiah ruahdamh a si. Inn cit motor pawl cu anmah tein kal ding an thlah cang nain lampi ah bomb a um sual lai ti an phang caah an kal ngam ve ti lo tiah theih a si. Zalen nih a tarlangh. Laitlang lei cu SAC ralhrang phu an nih an thazaang an chap cuahmah ko cang. Pathian nih Chin ram le kan miphun ralkap hna veng ko hna seh. Ref: Zalen
Leave a Reply