Nihin February 1 Ni Thawngpangtha: Caan Karlak Hakha Peng Zatlang Uknak Dirhnak Kong

Hakha Peng zong nih Caan Karlak Hakha Peng Zatlang Uknak an dirh ve cang i nihin, February 1, ralhrang phu nih hramhram in rampi nawlngeihnak an laknak kum 1 tlin ni bak ah phung ning tein thawngthanhnak an tuah. An thawngthanhnak cu a tanglei bantukin an langhter i, a tangah tlin tein rel khawh cio ding in kan van tarpiak chin hna.

Caan Karlak Hakha Peng Zatlang Uknak Dirhnak Kong: 1nak. Rammi mizapi duhnak he ralchanh in ralhrang phu nih hramhram in rampi nawlngeithnak an laknak kum khat a tling cang. Hramhram in nawlngeihnak an laknak cu Kawlram mizapi nih kan cohlang lo. Chinland ramchung, Hakha peng mizapi zong nih kan cohlang lo. Cucaah a lamkip in duh lonak langhter a si i, hriamnam thlai i dohthlennak a tuah mi dirhmun tiang kan phan.

2nak. Mizapi nawlngeihnak hramhram in laknak nih zapi nun-khuasaknak le chawleh chawhrawlnak fakpi in a tumchukter. Innlo tampi hrawkpiak kan tong i, rammi tampi umnak ngei loin ral kan zam. An duh paoh in rammi an kan tlaih, an kan hrem i mizapi thisen tampi a luang.

3nak. Ralhrang nih an nawlngeihnak an fehter khawh nakhnga lo le an hlawh a tlin nakhnga lo, rammi kan dihlak nih lungrual tein kan dohthlen lio a si. Cucaah kanmah kan kong cu kanmah tein kan i tawlrel i kan i ukhruai khawh nakhnga Hakha Khuapi chung le pengtlang hna telh in, “Caan Karlak Hakha Peng Zatlang Unak” (Interim Hakha Township Administration) cu dirh a si cang, tiah thawng kan in thanh hna.

4nak.Hramhram uknak le namneh uknak phun paohpaoh cu kan duh lo caah, Can Karlak Hakha Peng Zatlang Uknak nih 2022 Nohawng 1 thok in kan tei hlan tiang dohthelnnak cu pehzulh in kan tuan lai. Cun, Federal Democracy Ram sersiamnak caah le Hakha peng chung ukhruainak he aa pehtlaih mi thil vialte cu “Caan Karlak Hakha Peng Zatlang Uknak” nih tuanvo la in tawlrel a si cang lai. Caan Karlak Hakha Peng Zatlang Uknak. Credit: Hakha Campaign For Justice