Nihin January 17 Ni Lungbang Khua Pawng Kahdohnak Ah SAC Ralhrang 6 An Thi Than E

Nihin January 17 thawngpang: Chin ramkulh, Falam peng, Falam – Kalay lam cung Lungbang khua pawng ah nihin January 17 zing ah SAC ralhrang phu le CNDF ralkap phu kar kahdohnak a chuak i SAC ralhrang phu lei in 6 an thi i CNDF ralkap pakhat hliamhma (thinphang ding si lo) a tuar tiah CNDF lei nih thawngthanhnak an tuah.

SAC ralhrang phu hna cu Falam – Kalay motor lam in kal ti loin, motor lam in ni tlak lei Lati khua, Kulzam khua lei in an hel i an kal hna tiah theih a si. Cu lam in Falam – Kalay motor lam cung ah a ummi Zawngkawng khua lei ah an chuak te lai tiah ruahdamh a si.  A tangah NUG nih vawlei cawk zuarnak kong cathanh an chuahmi rel chih te. Ref: Zalen.

Thawngpang dang: SAC ralhrang cozah kuttang ah vawlei cawk zuarnak cu phung ning a si lo tiah NUG nih thawngthanhnak a tuah. Uknak latu SAC ralhrang kut tang um Mandalay myodaw Sipin committee vawlei cawk zuarnak kong he aa pehtlaihmi vialte cu phung lut an si lai lo tiah NUG cozah nih thawngthanhnak an tuah.

Mipi sin in phung ning loin uknak hramhram in a chuhtu SAC ralhrang cu United Nations telh in vawlei cung zei ram hmanh nih a cohlan lomi ralhrang phu an si caah anmah kut tang um zei bantuk department an si zong ah an thil tuahmi vialte cu zei san a tlai lo i phung ning a si lo tiah thawngthanhnak an tuahmi ah a langhter chih a si.

Atu hi Naypyidaw, Yango le Mandalay Sipin Tharzarye Committee hna nih sipin vawlei pawl cawk zuarnak an tuah lio a si tiah theih a simi cung ah tu bantukin thawngthanhnak cathanh an chuah hi a si i, ram vawlei a ngeitu taktak cu ram chung ah a ummi rammi an si caah zei ram hmanh nih cohlan lomi SAC ralhrang kut tang ummi hna nih cu vawlei kong ah tawrel khawhnak nawl an ngei lo tiah an thawngthanhnak an langhter chih fawn.

SAC kuttang um Sipin hna nih vawlei cawk zuarnak an tuahmi le vawlei gram an chuahpiakmi vialte cu phung ning lo an si caah cawk lo ding le a cawtu hna an um sual a si ahcun mipi nawl ngeihnak mipi sin a phan than tikah chuh/ting than a si lai pinah a zuartu le a cawtu hna zong upadi ning in dantatnak tuah an si lai tiah NUG nih an langhter chih fawn hi a si. Ref: Akonthi