Nihin KIA Le SAC Ralhrang Phu Kar Naungcho Kahdohnak Thawngpang Thar

KIA Le SAC Ralhrang Phu Kar Naungcho Kahdohnak: Shan ramkulh, Kyaukme district, Naungcho myone chung ah SAC ralhrang phu le Kachin Independent Army (KIA) phu kar, nihin January 23 ni, zinglei sang ah kahdohnak a chuak tiah KIA lei nih thawngthanhnak an tuah. Minung thazaang 100 hrawng a simi SAC ralhrang phu Tatma 99 kuttanag um ralhrang phu hna nih,

KIA ralkap phu an umnak ah an lut i an cawlcang caah kaphnih kar minute 30 chung hrawng kahdohnak a chuak tiah KIA lei nih thawngthanhnak an tuahmi ning in theih a si. Kahdohnak chung ah kaphnih in a thimi le hliamtuar kong he pehtlaih in KIA lei nih thawngthanhnak ah an langhter chih lo. Nizan January 22 ni zong ah Sagaing ramthen, Kathar myone chung ah a cawlcangmi,

SAC ralhrang phu minung thazaang 80 hrawng hna le KIA telhin PDF phufonh kar kahdohnak a chuak tiahtheih a si. Cu kahdohnak cu zinglei suimilam 7:15 am in 10:30 tiang a rau tiah KIA nih thawngthanhnak an tuahmi ning in theih a si. Kathar myone chung ah a cawlcangmi Kathar myone People Defense Force phu he naihniam tein a ummi Katha Revolution IR phu zong nih,

Nizan January 22 ni zinglei sang ah Katha myone Nat haling khua ah SAC ralhrang phu he an i kap tiah thawngthanhnak an tuah ve. Cu kahdohnak ah All-Burma Students Democratic Front (ABSDF), Northern PDF phu hna he kahmi a si tiah Katha Revolution IR nih an tarlangh. Cu kahdohnak ah SAC ralhrang phu lei in 7 an thi i,

Katha khuapi ah hrambunhmi SAC ralhrang No. 309 hriamngan tlaitu phu zong nih 120 MM tiah ruahmi hriamnam ngan in voi 6 tiang an kah hna i, cu hriamnam ngan kahmi ruangah khuami 2 hriamhma an tuar tiah an thawngthanhnak ah an langhter ning in theih a si. KIA phu hi chaklei Sagiang ramthen zong ah PDF phu he ibawmh in an cawlcang ngai ve hna. Ref: The Irrawaddy