Sagaing ramthen, Tamu myone, Wehzu khua in nichuak lei meng 2 hrawng a hlatnak ah a ummi SAC ralhrang phu Ok-pho Kanbaung Thonginn sakhan kahdohnak ah SAC ralhrang phu lei in thonginn bawi telh in 10 an thi i, mipi ralkap People Defense Force lei zong minung 2 nih ram le miphun caah an nunnak a pek tiah, Tamu People Defense Force phu nih thawngthanhnak an tuah.
Nizan January 10 ni zinglei suimilam 5:30 hrawng ah Ok-pho Kanbaung thonginn sakhan cu Tamu PDF Tatzing 1 nih an kal hnawh i cu lio ah an hriamnam chiah ding in PDF lei in an ti hna nain an duh lo caah thonginn biaw nih kah ve ding in nawl a chuak caah kaphnih kar kahdohnak a chuak a tiah theih a si. Cu kahdohnak um lio ah thonginn ngeitu nuva hna telh in,
Thonginn ah security a tuanmi ralhrang phu 11 an thi i, mipi ralkap People Defense Force lei in 2 a nunnak a liam ve i 4 nih hliamhma an tuar tiah theih a si. Mipi ralkap PDF 2 an thinak ruang hi vuanthan chungkhar hna an thi sual ve lai ti an phan piak i an zawn an ruah tuknak ah anmah tu an nunnak a liam hi a si i, hi hnu kahdohnak ahcun,
SAC ralhrang phu chungkhar a si mi paoh ahohmanh zawruah in ral kan doh ti lai lo tiah Tamu PDF phu nih an chim. A nunnak a liammi PDF 2 lak ah pakhat ruak cu lak an i timh nain kahdohnak dirhmun zoh chih i lak awk a tha rih lo caah aa tlaihmi a hriamnam he kaltak an si tiah theih a si. Hmanthlak tar chihmi hi thonginn ngeitu (thonginn bawi nuva hna an si. Ref: DNA
Thawngpang dang: Myopiah Kahdohnak A Fah Cang Lai Tiah Thongwa Youth Force (TYF) phu nih thawngthanhnak an tuah. Cucaah Thongwa myone chung ah a ummi khuabawi hna nih SAC ralhrang phu sin thawngpang pek lo ding in TYF phu nih ralrinnak kan pek hna tiah TYF phu in tuanvo ngeitu pakhat nih a chim. Thongwa myone chung ah khuabawi hna cu,
Nihin tiang an nunnak caah thinphang ding tiang dalan an tuan rih lo caah zalawn tein an um kal kho rih i, thawngpang an pek ruangah PDF lei fahnak pakhatkhat kan tong sual ahcun a phu in nan pek chanh ve lai tiah thawngthanhnak an tuah chih. Nihin tiang Thongwa myone chung khuabawi hna chungah mipi tuar ding tiang in thawngpang an pekmi a um rih lo.
Nain khuapi chung No 3 sang khuabawi Ne Win timi pa tu hi TYF pawl nih an ngiarmi cazin ah aa tel ti a si. No. 3 sang khuabawi Ne Win dah ti lo, a dang pawl cu an cawlcang tuk lo. Ne Win tu hi uico ralkap Bohmu pawng ah a um pengmi a si. Kan kalnak lam ah lung kan ipah sual rih lo caah dai tein kan zoh sawh ko” tiah a chim mipa nih a chim.
January 8 ni zinglei sang ah Thongya myone, Sinkho khua ah Mytel tower tung sehkhan cu TYF phu nih bomb an puah hnawh i, tuznglei zong cu tower tung a rak zohmi SAC ralhrang phu motor bomb an puah hnawh than tiah theih a si. Ralhrang pawl dirhmun zoh chih in kan cawlcang te lai tiah a chim chih. Ref: Delta News Agency
Leave a Reply