Shan ramkulh le Karenni ramkulh ramri ah a ummi Phekhon myone, Kungsun khua pawng i SAC ralhrang phu sakhan pakhat cu Phekhon PDF phu nih nihin January 29 ni, zinglei suimilam 6:30 am hrawng ah an lut hnawh i an kah hna ruangah SAC ralhrang phu lei in 10 nak tlawmlo an thi tiah Phekhon PDF nih thawngthanhnak an tuah.
Kaphnih kar kahdohnak a fah ruangah zinglei suimilam 6:20 in 9:10 am tiang kahdohnak a chuak i, Phekhon PDF phu lei in minung 2 nih hliamhma an tuar ti si. Cun zinglei suimilam 8:50 am hrawng ah SAC ralhrang phu lei nih cung lei in raltuknak Jet fighter in an kah hna tiah theih a si.
“Phekhon khuapi lut lai ah zinglei in kahdohnak a chuak cang. Kahdohnak hi a fah ngai. Phekhon Tatzing hi hmasa ahcun 60 MM tibantuk lawng an rak hman tawn, atu cu 106 MM tiang pehzulh in an hmang cang” tiah Local Media Source nih a tarlangh.
“Tu zing kahdohnak cu a fah ko. SAC ralhrang phu lei nih vanlawng tiang ah an kah bawm. PDF, KNDF, KA phu fonh he kahdohnak a chuakmi a si. Khat lei in Internet line zong an phiat tikah, kahdohnak kong fiang tein kan thei kho dih rih lo. Nihin cu kahdohnak fah aa pehzulh lai ka zumh” tiah KNDF phu chungtel pakhat nih Yangon Khit Thit Media ah a chim ve.
SAC ralhrang phu hna hi Karenni ramkulh chung ah thazaang tampi chap in ral an doh i Sisai – Loikaw motor lam thluan ah SAC ralhrang motor 80 leng zong nizan January 28 ni, zanlei sang ah an chuak tiah khuami hna sin in theih a si.
Phekhon myo ahhin SAC ralhrang phu i No. 7 Military Operations Command Headquarters le a kut tang ah a ummi Light Infantry Battalions, LIB 421, LIB 336 battalions hna le Artillery battalions le anmah a bawmhchanhtu Supply battalions hna nih hmunhma khur hna tiah theih a si.
Hmanthlak tar chihmi hi Phekhon PDF phu nih 2021 kum, September thla lio i, Phekhon hrambunh ralhrang phu hriamngan in an kah lio hmanthlak a si. Ref: KTM
Leave a Reply