NUG Nih Minung 35 Leng Meikhangh Thattu Ralhrang Pawl Cu ICC Ah Tehte Tling He Taza A Cuai Lai

NUG Nih Minung 35 Leng Meikhangh Thattu Ralhrang Pawl Cu ICC Biaceih Zung Ah Tehte Tling He Taza A Cuai Lai: National Unity Government nih Karenni ramkulh, Moso khua pawng i minung a tomtom in meikhangh thahnak a tuahtu SAC ralhrang phu cu a fekmi tehte tling he International Criminal Court (ICC) ah kan chuahpi lai tiah National Unity Government in nuhrin covo lei vuanci U Aung Myo Min nih a chim.

“NUG nih hi kong ah sualnak a tuahtu kan langhter lai i, dantatnak tuah kho ding in ICC biacei zung tiang kan phanpi lai. Hi kong ah ramkhel ca caantha lak in kan tuah lai lo. Hi sualnak a tuahtu a sual man dantat kho ding in kan tuah lai” tiah nuhrin covo lei ah Union level in vuanci a tuan liomi vuanci U Aung Myo Min nih a chim hi a si.

Kayah (Karenni) ramkulh, Phruso myone, Moso khua pawng ah a cangmi mipi 35 leng meikhangh thahnak kong ah SAC ralhrang phu Khamayah 531 le Tatma 66 kuttang um Tatzing nih hruhru hranghrang in an tuahmi a si tiah Karenni State Police (KSP) in chimhnak nawlngeitu Ko Bo Bo nih a chim ti si.

“Hi meikhangh thahnawnnak kong ah abiapi in sualnak a tuahtu hna cu Myanmar army regional command kuttang ah a ummi, Phruso hrambun Khamayah 531 ralkap phu le Tatma 66 kuttang ummi ralkap phu hna an si” tiah Karenni state police in chimhnak nawlngeitu Ko Bo Bo nih a chim hi a si.

SAC ralhrang phu lei in mei an khangh i a thimi hna cu PDF phu pawl an si tiah anmah i chimhkanhmi cu a dik lomi a si i, a thimi hna cu sualnak ngeilo mipi sawhsawh an si hna tiah anmah le chungkhar cio zong nih fianternak an tuah ko hna ti si.

Karenni State Police (KSP) phu nih an ruak pawl an lak lio ahhin mei nih a kangh chih lomi mithi ruak 4 le mei nih a kangh ruangah a tak pum a cheuchum lang a tangmi mithi ruak 31 an hmuh hi a si i vutcam ah aa cang mi lak awk a tha ti lomi ruak zong an um tiah fianternak an tuah ve.

SAC ralhrang phu nih mithi ruak pawl an thah ning cu an hnulei in hri an tem i mei an khanghnak, an ttang ah hliamhma he an hnulei in hri an tem i mei an khanghnak, zohchia hruhrang ngai in an thahnak hmanthlak pawl le tehte hna he fianternak an tuah tiah theih a si. Ref: KTM