Paletwah Peng Le Sami Khua Ah Facang Pung 2 Pek In Ralhrang Lungtlinnak Langhter Ding An Lemsoi Hna

Chin ramkulh Paletwah peng le Sami khua ah ralhrang lungtlinnak langhternak ah aa telmi hna cu facang pung 2 kan in pek hna lai tiah an lemsoi hna.

Sami khuami pakhat nih cun “Ral tih in a zaami hna cu hramhram in an auh hna. Tonnak cu GAD zungin sipin zung tiang kal a si lai i cuka cun an kir than lai. An sinah a kal vemi minung pakhat ah facang pung 2 cio pek an timh hna. Cun Leihkung sang ah cun minung 50 nan chuak lai tiah nawl an pek hna” tiah a chim.

Kum 2017 i ralhrang le AA kahdohnak ruangah inn le lo chuahtak in a zammi hna cu atu tiang Paletwah le Sami i ralzam zohkhenhnak ah an um peng rih ko tiah theih a si. Ref: Mizzima

Tanhse Le Kyun Hlah Pengah Ralhrang Nih Vanlawng In Bomb An Thlak: Sagaing ramthen, Tanhse le Kyun Hlah (တန့်ဆည်မြို့နယ် & ကျွန်းလှမြို့နယ်) chungah Otc 28, tuzing ah ralhrang nih raldohnak Helicopter in an kah len tiah theih a si.

 Tanhse peng khuami pakhat nih “Tanhse, Sitha khua pawngah voi 4 an kah. Khuachung ah cun an kap lo, leikuang i thlam an kahmi a si. A theimi vialte tihnak in an khat i leng an chuak ngam lo. Kan khua in chaklei Kyun Hlah lei ah an zuang. Cuka zongah voi 30 hrawng an kah thawng kan theih” tiah a chim.

Tanhse peng thlanglei ah a ummi Kapaungkyah (ကပေါင်းကျ), Nanondaw (နနွင်းတော) le Sitha khua hna ah voi 4 an kah. Cuka cun Kyun Hlah lei ah an zuang i voi 30 hrawng an kah than. Zinglei 9:30 am hrawngah cun raldohnak Helicopter 6 hna cu Yee Oo, Monywa lei ah an zuang tiah tualchung thawngthanhnak nih an tial. 

Khuami dang pakhat zong nih “Hmasa zongah Helicopter cu a ra tawn ko, asinain pakhat lawng a ra tawn. Atu cu paruk bak an si. Tanhse peng chungah PDF an kawl hna ruangah a si men lai. Jet Vanlawng pahnih zong a zuang len ve, asinain annih cu an kap lem lo” tiah a chim.  Ref: Khet Thit Media

The Chin Post