Thawngthar: PDF Phu 2 Fonh Nih Ralhrang 20 Leng A Thah

Sagaing ramthen, Monywa myo in thlanglei ah January 20 ni zanlei suimilam 6 hrawng ah a kalmi SAC ralhrang phu motor run cu Monywa – Chaung U lam ah Chaung U – PDF le Monywa – PDF phu fonh nih bomb an puah hnawh i ralhrang motor 2 an dirter i, cu motor cung in a tummi SAC ralhrang phu pawl nih an pawngkam ah hriamnam ngan he hriamnam hme he,

An kah hna lio ah PDF phu fonh nih bomb dang an puah hnawh than i ralhrang 20 leng an thi tiah Chaung U PDF phu nih thawngthanhnak an tuah. Cu bomb puah hnawh in dohnak kong cu Monywa PDF le Chaung U PDF phu nih tu zing ah thawngthanhnak an tuah cang nain, SAC ralhrang phu lei in ralkap bawi pakhat telh in 20 leng an thi tiah zanlei sang ah thawngthanhnak an tuah than.

A voi 2nak bomb an puah hnawh hnu ah ralhrang pawl meithal puah thawng a dai i, Monywa lei in inn cit motor 10 in a thimi hna le hlaimhma a tuarmi hna an rak lak hna ti si. Motor lam cung ah a thimi hna an titsa pelpoi an kawl hi zan tim suimilam 12 tiang an rau tiah PDF phu nih thawngthanhnak an tuahmi ah an langhter chih.

Cu hnu ah SAC ralhrang pawl cu khuami motor hna kha ikhamnak ah an hmang i a rawkmi anmah ralhrang motor 2 cu hri in an hnuk hna ti si. Cun SAC ralhrang phu nih an kahmi ruangah sualnak ngeilo khuapi pakhat meithal kuan nih a khenh sual i a nunnak a liam tiah theih a si. Khuami hna zong nih SAC ralhrang pawl an umnak pawng ah,

Um kal lo ding le ralhrang phu motor he naihniam tuk in motor mongh le um kal lo ding in Chaung U – PDF phu le Immortal Gurrilla Force (IGF – Monywa) nih ralrin peknak an tuah chih tiah theih a si. Nihin January 22 ni ah Kawlram pumpi chung SAC ralhrang a thimi an tam ngai hna. Khit Thit Media nih a theih khawh tawk in a tarlangh ning cun 79 an thi tiah a tarlangh.

Cucu Chin ramkulh chung 40 hrawng an thi timi an langhter chih rih lo. Nihin Chin ramkulh chung kahdohnak ah Chin ralkap pasaltha pahnih nih ram le miphun ca an nunnak an pek i, SAC ralhrang phu lei in 40 hrawng an thi lai tiah ruahdamh a si. Cucaah Kawlram pumpalulh ah ralhrang a thimi hi nihin lawng ah 100 leng an si tinak a si. Ref: KTM