Tu zing Vaurawng Zuunthil – Vaan ralvennak group nih Van Ralvennak Campaign tiah tlangtar in CNF Chairma Pu Zing Cung cu special in an sawm i, online in biaruahnak an ngei. Cu biaruahnak ah biaruahtu hna nih biahalnak tampi an tuah i, cu chungah ZRO ZRA he pehtlaihnak an ngeih le ngeilo kong zong an hal chih hna.
Cu ZRO ZRA kong he pehtlaih in Pu Zing Cung nih a tanglei bantukin fiang ngai in lehnak a tuah hna. A chimmi cu, ZRO/ZRA he hin phungning tein voikhat hmanh kan i chawn bal lo. Kum sau ngai an dir cang i kum sau ngai kan dir ve cang nain phung ning tein kan i chawn bal lo. Zeiruangah ti a si ahcun India cozah a dohmi ralkap buu an si caah a si.
Kannih cu India cozah i dawt kan duh. Ral i ser kan duh lo caah India a dohmi cu zeiti hmanh ah pehtlaihnak tuah a tha lo i, nihin tiang kan i chawnh lonak a si. Kan ram i a rak lutmi hna khi ZRO/ZRA Eastern a ti caah nichuak lei timi min an i bunh i nitlak lei buu an um rih tinak a si cu. Nitlak lei cu India ram ah a si. ZRO/ZRA cu India cozah he kah ngawlnak an tuah i,
India ram chungah phung ning tein a ummi an si. Cucu ZRO ZRA kong a si caah khan, India a dohmi a si caah khoika hmanh ah kan chawnh lo i khoika hmanh ah bia kan ruah lo. Kan ram chung ah dohthlennak a tuahmi ralkap buu an si ti zong kha kannih party nih kan pom ve lo. Anaite ahkhan kahnak a chuak.
Khakha zeiruangah dah ti kha cu CJDC (Chinland Joint Defense Committee) nih statement tha tein an chuak cang. A ruang zong tha tein an chimh cang. CJDC i aa telmi PDF Zoland kha voihnih tiang a kah hna. Cun PDF Zoland i an hruaitu pa zong kha an tlaih i an thah. Cun ralhrang hna he zong pehtlaihnak an ngei timi kha a fek fuanmi theih a si.
An i pehtlaihnak mu. Cu leng ah India ah a ummi hriamtlai bu zong kha an ram ah a umter hna i pehtlaihnak a ngeih lengmang ti kan theih caah, cu batuk harsatnak a pek lengmang mi kha warning pek lengmang i warning pek man a ngei lo caah khan Joint CJDC nih khan an kahmi a si. Cucu na ka halmi ZRO ZRA kong kha a si. Hi hi Pu Zing Cung nih a chimmi cu a si.
ZRA hriamtlai phu cu Zoland ah anmah hriamtlai bu lawng an um lai an ti i, nai ah PDF-Zoland hruaitu pa an tlaih i a thahtu phu kha an si. India ram chung le Kawlram chung an cawlcangh i, Kawlram ah tu lio hramhram in uknak a latu SAC ralhrang he pehtlaihnak an ngei tiah zumh an si. Laknak: Vaurawng Zuunthil – Vaan ralvennak
Leave a Reply