R.I.P: Pasalttha Henry nih Raaldohnaak Ah A Nunnaak A Pek E- Pasalttha Henry hi Sianginn fimcawn naak in Degree a laak hnu ah, Sianginn cachimh rian a sok i kum zeimawzat chung Sianginn ah cachimh rian a ttuan hnu, Min Aung Hlaing nih rampi uknaak a laak ruang ah CDM a tuah.
CDM tuah lawng hmanh si loin, Meithal tlaih in PDF ah a luut i Miphun zalennaak caah raal a doh cuahmah lio ah raaldohnaak hmun ah a nunnaak a pek hi asi.
Kumhlun donghnaak, kumthar lai Ni, December 31, 2021 ah khan Kayah ramkulh, Demoso khuapi chung Dawr pakhat cu SAC raalhrang nih an luh hnawh i umhmun khuar naak ah an hman, cu hmun ah a um mi SAC raalhrang pawl cu Khuami nih an kah hmasa hna.
Cu hnu ah KNDF, PDF hna nih SAC raalhrang cu an kah hna i kaphnih karlak raaldohnaak a fah ngai hi asi. Cu raaldohnaak cu zinglei suimilam 8:00AM in zaanlei suimilam 6:00PM tiang pehzulh in a um.
Cu ahcun Pasalttha Henry zong cu hmaisuang ah um mi raaldohnaak ahcun a rak i tel ve hi asi. Hi raaldohnaak ah hin KA, KNDF le PDF an i bawm, cu ticun pehtlai in kahnaak, raaldohnaak hna cu faak ngai in a chuak.
Hi raaldohnaak ah hin SAC raalhrang lei a thi mi le hliamtuar mi an um len ti asi. Cun SAC raalhrang lei nih Bomb, Miakpi an kah mi nih Pasalttha Henry cu a khen caah hliamhma faak tuar in an um i namchan in a himnaak lei ah an tliik pi colh.
Cu ti cun Sii lei zohkhenhnaak ttha tein an pek ko nain, a hliamhma a fah ngai caah, chanchuah khawh ti loin, nihin January 2, 2022 ah a nunnaak a liam hi asi.
A mah hi sianginn cachimh rian a ttuan mi a si nain raalhrang uknaak aduh lo caah CDM ah a luut, cu lawng si loin hriamtlaih in PDF ah a luut lawlaw i biatak tein SAC raalhrang a dohnaak ah a nunnaak tiang a pek hi asi.
Leave a Reply