R.I.P : PDF-Kalay in Mino Pahnih nih Ram ca ah Nunnak an Pek Than

November 21 ah Kalay peng, Kyauhpyuh khuate pawng kahdohnak ah PDF-Kalay in Ko Min Zaw Aung le Ko Zaw Naing Htay nih an nunnak an pek tthan.

Kyauhpyuh khua pawng kahdohnak a SAC ralhrang 5 an thi, tiah PDF-Kalay nih thawngpang an chuah. Cred : The Chin Journal

Relchap : Ralkap Uknak Tang Um Sudan Ram Prime Minister nih Ralkap Bawi Min A Thutpi Hna

Africa Chaklei um, Sudan ram cu thlakhat deng ralkap uknak tang an um hnu ah nizan November 21,2021 ah khan an prime minister Abdallah Hamdok nih an ram hruai than dingin ralkap bu hna he minsenthutnak an ngei. Hilio ah an prime minister minthutnak a cohlang duhlo mi tampi nih an khuapi ah duhlonak an langhter ve. An prime minister Abdallah Hamdok hi ‘leirawitu’ tiah opposition party hna nih an au hnawh.

Ralkap bawi hruaitu Abbel Fattah Burhan nih cun TV in mipi theih ah an prime minister Abdallah Hamdok nih an ram thimnak an ngeih hlan cu cozah a hruai than lai kong a chim. An prime minister nih hin zei bantuk nawlngeihnak a ngeih lai kong fiang tein an chim lo. Ralkap mithmai zoh bu tein an kal rih lai kong an chim. Ramkhel party dangdang nih hnatlakpinak an ngeih cio le ngeih cio lo zong a fiang rih lo, tiah VOA nih a tial. Hi minthutnak ah hnatlaknak an tuahmi cu, October 25 in ralkap nih nawlngeihnak an lak hnu in an tlaihmi vialte an chuah dih hna lai, tiah an langhter.

“Hi minthutnak ah hin ram aa thlen chung vialte remdaihnak a um khawh nakhnga hnatlaknak aa tel,” tiah TV hmai ah Abdullah Hamdok nih a chim. Hi lio ah hin Sudan khuapi, Khartaum ahcun mipi nih duhlonak an rak langhter ve. An prime minister Abdallah Hamdok nih mipi a leirawi hna, tiah an aupi. Nizan duhlonak langhternak ah hin kum 16 mipa ralkap nih an kahthah. Sudan ram ralkap nih nawlngeihnak an lak ni October 25 hnu in nizan tiang ah khan minung 41 nunnak a liam cang, tiah Al Jazeera nih a tial.

The Chin Post