Ralhrang Nih CND Tuah Dingmi Ah Aa Tel Mi Cu Kan Ral Ah Ruah A Si Lai

Ralhrang Nih CND Tuah Dingmi Ah Aa Tel Mi Cu Kan Ral Ah Ruah A Si Lai: SAC ralhrang phu hruainak in tuah dingim a voi 74 nak Chin National Day ah aa telmi hna cu Dohthlennak tuahtu hna ral ah ruah nan si lai i dandatnak tuah nan si lai tiah Mindat myone, People’s Administration phu nih nihin ah thawngthanhnak an tuah. February 20 ni ah tuah tawnmi Chin National Day (CND) cu SAC ralhrang phu nih,

Mindat khuapi ah tuah an timh i ahohmanh nih telpi lo ding in Mindat myone Mipi Uktu phu nih an kham hi a si. SAC ralhrang phu nih Chin ramkulh ah offensive in Chin ralkap he mipi he an doh peng i Chin miphun tampi zong phung ning lo in le a ruang um loin an tlaih an thah hna pinah an inn zong an khangh piak hna.

SAC ralhrang phu nih cu bantukin pehzulh in Chin miphun an kan tuahto ko lio ah anmah hruainak in Chin National Day kan tuah lai an timi hi a si. Cucaah ahohmanh telpi lo ding in Mindat myone Mipi Uktu phu nih tu bantukin cathanh an chuahmi hi asi. An cathanh chuahmi a tanglei ah kan tar piak chih hna.

2022, Februay 20 ni ah a voi 74 nak Chin Miphun Ni cu SAC ralhrang phu nih Mindat khuapi ah an tuah lai tiah theih a si caah Mindat myone chung a ummi mipi dihlak nih zulh dingmi pawl a tanglei bantukin thawngthanhnak kan tuah. 1nak. SAC ralhrang phu nih tuahmi puai, meeting tibantuk, zeibantuk rian a si hmanh ah, SAC ralhrang phu he ibawmh in nan tuah/tuan hrimhrim lai lo.

2nak. SAC ralhrang phu nih tuah dingmi Chin Miphun Ni ah ralkap buu bukhatkhat in siseh, miphun pakhat khat in siseh, nunphung phu pakhatkhat min in siseh, zeibantuk pehtlaihnak hmanh ngeih lo ding in theihter kan in duh hna. 3nak. SAC ralhrang nih tuahmi puai ah miphun leirawi tu hna cu Dohthlennak tuahnak ah kan ral ah ruah nan si lai i, dantatnak tuah nan si lai. Ref: Delta News Agency