Karenni ramkulh, Farosu (ဖရူဆို), Mosufet (မိုဆိုဖက်) ah Dec 24 ah ralhrang nih khuami 35 hna cu a nung buin mei an khangh hna tiah Karenni Nationalities Defense Force-KNDF nih an thanh.
Meikhangh in an thahmi hna lakah nu le ngakchia hna zong an i tel, mei nih fak tuk in a kangh hna caah mizei dah an si ti theihfian a si rih lonak cu KNDF nih an cathanh ah an langhter. An thahmi hna hi ralhrang ṭih in an zam lio, lampi ah ralhrang nih an tlaih hna i an i citmi mawṭaw he an khangh hna hi a si.
Ralhrang nih sualnak ngeilo mizapi a bu in an thah/khangh lengmang mi hna hi minung hawi cung i sualnak nganpi an tuahmi a si tiah KNDF nih an cathanh ah an ṭialchih fawn.
Karenni mino hruaitu pakhat nih cun “Farosu peng Mosufet ah nizan i tlaih a tongmi khuami nu le ngakchia an dihlak hna cu an i citmi mawṭaw he ralhrang nih meikhangh in an thah hna. An chungkhar ngaihchiatnak kan i hrawm ve. Ralhrang hna cawlcangh ning cu nikhat hnu nikhat in a zualhma chin lengmang. Atu tiang kan fehter khawhmi cu miruak 30 nak tlawmlo an si cang” tiah a chim.
Kayah tiah theihmi Karenni ramkulh, Farosu peng Mosufet khua pawngah Dec 24, zinglei 11;:30 hrawngah Demoso peng lei in a rak ra mi ralhrang hna le Karenni ralkap hna cu suimilam 4 renglo chung an i kap i kaphnih a thimi le hliamtuarmi fehter khawh a si rih lo tiah Khet Thit Media nih a ṭial.
An i kah lioah ralhrang hna nih cun khua chungah a ummi mawṭaw le saikel 11 pin ah inn cheukhat hna cu mei in an khangh i ngakchia pakhat telh in khuami 10 hna cu a ruang um loin an tlaih hna. Cuti an tlaihmi khuami 10 hna thlah ṭhan dingin ralhrang hna he biaruah ah a kalmi mizapi ralkap pali hna cu ralhrang nih hri in an ṭem hna hnuah an lu ah meithal in a kah hna tiah theih a si.
The Chin Post
Leave a Reply