Ralhrang Palek Phu Nih Ramdangmi Tampi Le Phaisa Sing 2000 Leng An Tlaih Hna

Ralhrang Palek Phu Nih Ramdangmi Tampi Le Phaisa Sing 2000 Leng An Tlaih Hna: Yangon ah a thli (hmongkho) in tuahmi Taluk Casino zung pakhat cu ralhrang nih an lut hnawh i vuanthan 100 deng le ramdangmi tampi an tlaih hna. Yangon ah Taluk miphun hna nih a thli tein an tuahmi Casino zung pakhat cu nizan ah SAC ralhrang phu nih an lut hnawh i ramdangmi tampi le Kawlram mi vuanthan 100 dengmang hna cu,

Game cannak phaisa sing 2000 leng he an tlaih hna tiah theih a si. January 25 ni zanlei sangah SAC ralhrang palek phu hna cu Hlaingthayar myone, Panhlaing golf tual lam ah a ummi Casino zung pakhat cu an lut hnawh i mi an tlaih hna i cu casino zung cu Taluk miphun hna nih an hruai i an tuahmi a si tiah theih theih a si.

Cu Casino zung ah Kawlrammi vuanthan 100 dengmang an um i, nikhat ah riantuan caan sml 10 nak tlawm lo an tuanmi kum 18 tang mino tete zong nih rian an tuan ve tiah theih a si. “Riantuanmi tleirawl pa tete an tam tuk. Rian a har tikah cu ka hmun ah phaisa hmuh a fawi caah an tuanmi si thio lai” tiah Casino zung pawng ummi pakhat nih a chim.

SAC ralhrang palek pawl nih cu Casino zung an lut hnawh ahhin cu Casino zung chung ah ramdangmi zong an ra i an i celh ve hna tiah theih a si. Vuanthan hna le ramdangmi hna le a dang game a celhmi dihlak minung 150 leng hrawng cu an game cannak phaisa Kyat sing 2000 leng he tlaih an si tiah theih a si. SAC ralhrang phu hna cu nawlngeihnak an lak chung ah,

Hnalung-thi, tunglung-thi tibantuk game pawl caah ngunkhuai an lak i celhnak khunh an onh hna nain tu bantukin tlaihkhih timi hi a um bal theng lomi a si tiah Yangon khuami hna nih an chim tiah Delta News Agency nih a tarlangh hi a si. Ralhrang pawl cu tu lio phaisa an harsa lio a si, khuami thilri le phaichuh in an vak len lio ah tu bantuk Casino zung pakhat hi hi zatzat phaisa an hmuhmi cu an i lunghmui ngai ko hnga. Ref: DNA