Ralhrang Ruangah Nunnak Liam Mi Hna Cu Covid Zawtnak An Puh

Ralhrang Ruangah Nunnak Liam Mi Hna Cu Covid Zawtnak An Puh Lamzawhnak ah tha tho ten ai tel mi hna Mandalay ramthen,Vuantun(ဝမ္းတြင္း) peng, Tesuh khua in U Soe San le U Zaw Lyin ralhrang le palik 30 hrawng nih an inn ah luhhnawh in jun 28 zaantim ah an kalhnawh hna nain ,inn ah an rak um lo.

Ralhrang nih U Zaw Lyin nupi cu an kal pi nain lampi ah an thlah than.”Zeihmanh an tuah lo, kan fianh lai, chungkhar harnak an pek hna lo ding ah ka va ton hna” tiah min langhter lo mi pakhat nih a chim.An Khua NLD chairman U Soe San (kum-44) cu a thaizing ah a nunnak a liam.Zei tin a thih ning cu hlathlai nak an tuah an hal lengmang hna hnu ah , ka kut a luan sual, ka thah ko tiah cuka khua mipa pakhat nih a chim.

Covid zawtnak ngeimi ruak an fim bantukin a ruak cu plastic ah chia in a ruak cu fim a si caah a hmai zong tha te in zohnak nawl an ngei lo tiah chungkhar he pehtlai mi pakhat nih a chim.Ralhrang hna nih an mah a dohkalh tu hna cu tlai in an hrem hna hnu ah suimilam 24 chungah an nunnak a liam mi hna chung in cheukhat cu Covid zawtnak ruangah a nunnak a liam tiah chungkhar sin le pawngkam ah theihter nak an tuah tiah theih a si.

A thi mi chungkhar hna zong, a thih hnubik caan hmannak ah an ruak pawngte in zohnak nawl an pe hna lo, chungkhat le rualchan zong thlan ah thlah nak nawl zong an kham.U Soe San le U Zaw Lyin cu rallokap nih sii-inn ah checkhlat nak an tuah hna hnu zaan suimilam 12 hrawngah Pintalay(ပင္းတလဲ)Palik sakhan ah an kuat hna, cu hnu ah U Soe San cu mah hngal lo in a um caah siizung ah an kuat than tilawng chungkhar nih an theih khawh mi a si.A thaizing June 30 zing suimilam 11 hrawngah U Soe San a thi cang ti thawng an theih caah chungkhar nih ruak hlam an i zuam na in an tlam tling lo.

July 1 chunhnu ah Vuandun ( ဝမ္းတြင္း) khua thlanhmun ah ruakvui nak an tuah ah hmanthlak lo ding le , online cung ah langhter lo ding in, thawng langhter lo ding in rallokap nih an ti hna.Chungkhar le chungkhat minung 10 lawng thlan hmun ah kal nak nawl an pek hna, vanlawng lei in le Engineer rallokap minung 30 hrawng nih hriam tling he an um ve.

U Soe San he tlaih a tong mi U Zaw Lyin cu July 3 ah minthut ter in a luat . U Zaw Lyin cu hliam hma a tuar, angki zong a mah ten hruk kho lo dirhmun in a um tiah khuami hna sin in theih a si.An pahnih kong he pehtlai in palik sakhan ah thawngpang hal an si ko nain phone in pehtlaih khawh an si lo.

The Chin Post