Bank Track le Justice for Myanmar nih International level in rian a tuan lio mi bank ngan 9 nih ralhrangbu he i pehtlaihnak a ngei mi International company ngan 18 ah US $24 billion leng invest an tuah mi cu ngol piak dingin an nawl.
Mah Company ngan 18 hi ralhrangbu he a rak tuanti cang mi le ralhrangbu nih nawlngeihnak an lak hnu ah an kut tangah a lut cang mi cozah riantuannak pawl he kum saupi i pehtlaihnak an rak tuanti cang tiah theih tiah JFM nih a ti.
Ralhrangbu he pehtlaihnak a ngei mi company 18 ah invest a tuah mi ah Mitsubishi UFJ Financial Group (MUFG), Sumitomo Mitsui Financial Group (SMFG), JP Morgan Chasei, UBS, Credit Suisse, Morgan Stanley, Bank of America, Wells Fargo le BNP Paribas te hna an tel.
Mah bank pawl nih an invest mi hi US $1 billion an si. MUFG company pakhat lawng hmanh US $ 5 billion, SMFG le JP Morgan Chase nih US $4 billion share an ngei. Goldman Sachs nih ralhrangbu sin ah ralkap thilri a pek mi Bharat Electronics ah covo 5.7% a ngei tiah theih a si.
Hi kong he pehtlaih in Bangladesh foreign minister Dr. AK Abdul Momen nih “ram cheukhat hna cu biatak tein minung covo a buar cuahmah mi Kawlram kong ah Minung covo kong an au len nain khatalei ah an bawmh hna hoi. An lu lei meitil, an tawlei ti dirhmun an si” tiah a chim.
JFM chimhnak nawlngei Ma Yadanar Maung nih “an sipuazi miaknak an rak hmuh tuk caah ralhrangbu nih mahtluk an cawlcangh ngam mi hi a si. Hi kongah bank pawl hi an biapi tuk, an tuah dingmi an tuah lo mi a tam tuk cang. Atu ah kan tuah lo ahcun mipi cungah mawhphurhnak kan hlanng lai lo an ti lai” tiah a chim. February 1 uk nak an lak hnuah ralhrangbu nih vanlawng he meithal ngan hman in tlangcungmi an kah ruangah mi 800 leng an thi cang.
Mah vialte an tuah khawhnak cu ramdangin sipuazi lei miak nak an hmuh peng ruangah a si. Atu zong bank 9 nih ralhrangbu he pehtlaihnak a ngei mi company ngan pipi 18 ah investment a tuah peng rih caah Justice for Myanmar nih a nawl nak hi a si….
Credit The Chin Post
Leave a Reply