Ralhrangbu kal an i timhnak Darung lam KIA nih an phih,kahnih i kahnak a fak

September 8 zinglei suimilam 10:45 hrawngah Tanaing le Shingbawiyang lei a rak kai mi ralhrang 100 hrawng cu Lajiabum ah KIA he fak ngaiin an i kap tiah theih a si.

Tanaing in Darung lei kalnak Tanaing – Shinbawiyang lam hi nizaan September 7 zinglei in KIA nih an phih cia mi a si.

Taniang in mawtaw he a rak kai mi hna cu Pannet khua ah phih an si i, Shinbawiyang in Tanaing lei a tum mi hna cu Lajiabum khua ah KIA battalion 45 nih an phih.

Darung khuami pakhat nih; langtlang in an khamh mi a si.Atu ralhrang pawl Shinglung Ga an phan cang. KIA lei nih nan kal ahcun kan in kah hna lai tiin kan kham, ralhrang lei zong cunglei order a si i, an kal hrim lai ka zumh tiah KNG sin ah a chim.

I kahnak kong he pehtlaih in khuami pakhat nih; a tunai bak an i kap. Meithal ngan thawng kan theih hmasa, mah hnu cu meithal thawng a dai ti lo. Ralhrang hna hi nizaan in an rak phan cang. KIA lei nih an rak kai rih ahcun kan kah hna lai an ti hnu an kai chih caah tuzing cu an i kap cang tiah a chim.

Darung khua hi ralhrangbu hna an rak um bal nak a si i, ralhrangbu nih uknak a lak hnuah ROC – Tanaing ah an i fonh hnuah KIA battalion 45 nih umhmun an khuar cang.

Tuzing i kahnak ruangah Lajiabum khuami hna cu hmunhimnak lei ah an zaam tiah khuami pakhat nih a chim tiah Kachin waves nih a chim.

The Chin Post