Ralhrang nih Uknak an laknak kumkhat a tling. Kan miphun tuanbia ah kan ton ballomi thlennak tampi a um. Zaanmang hna a lo. Nusal pasal tha tampi nih nunnak a pek, ngeihchiah chawva tampi an ciam, Cozah riantuan hna nih an rian an chuahtaak, sianghngakchia tampi fimcawnnak an peh kholo, chungkhar unau hmun zakip ah ithenthek asi.
Ralhrang nih hriamnam bochan in mipi uk an itim nain; nawlngeihnak an la kholo, an duhning in rian an tuan kholo, mipi thinlung an teilo. Atutiang ah; CDM peh zulh peng asi; CDF/CNA an thawng chinchin; Ramkip Cozah sinah hmunhma kan la.
Chinram huap in Mipi Cozah dirh asi cang lai. Mahle khua, pengtlang in ramkulh Cozahpi dirh asi cang lai. Fimcawnnak, ngandamnak, le a dangdang tawlrel dingah timhtuah asi cang. A zalenmi Chinland aa ser cang ti awk asi. Ralhrang hna le an mithi pawl an tla thluamah cang, an thazaang a zawr, a zultu hna an zawr duahmah cang.
Kum 70 chung hriamnam rumro a cawmi le ai zalhmi cu hitluk hi cu an nguh ve awk le a dir khawh ve awk asi ko. Nain sau an hmun ti lai lo. Hi vialte teinak hi, a neptemi asilo; thisen nunnak thap in dohthlenmi asi. Ramchung ramleng kan ti khawhnak lam cio in iteltum rih hna usih. Kan lungrawk hin hlah seh, kan lungthul hlah usih.
Kan lungrualnak, kan thinlung picalnak le Bawipa tanpinak in kan tei hrimhrim lai. (Atangah Saya Tluang Hre nih kumkhat chung kan tuarnak a tialmi relchap ding kan tarpiak chih hna.) Credit: Ram Tinthei
Saya Tluang Hre tialmi rel chap: Nihin cu Ralhrang nih mizapi sin in uknak an kan chuhnak kumkhat a tlin ni a si. Kumkhat chungah rammi zeitluk indah kan temhtuar, hmailei ram le miphun nih bochan dingmi mino zeizat ko nih dah mual an kan liam tak, chungkhar nih zohthla bihzun lenmi mino zeizat ko hen pum tlaamtling lo ah an i can.
Kan inn le kan lo zeizat kodah an kan khanghpiak. Minung zeizat ko dah ralzam dirhmun kan phanh. Chim ding a tamtuk lai. Ruah ah lung a fak tuk ee. Cu a si caah hnutawlh awk kan țha ti lo, kan lung i rual seh, kan thazaang i funtom seh, kan tei hlan lo kan doh lai, Bawipa he cun kan tei hrimhrim lai.
Salm 30:5, A thinhun cu caan tawite chung lawng a si; a ṭhatnak tu nih cun chantlung a nguh. Zan ah mitthli tlaknak um hmanh seh law zinglei ah cun lawmhnak a ra ṭhan ve.
2 Siangpahrang 19:19, Cucaah maw (Bawipa) kan Pathian, vawlei cung pennak vialte nih, maw (Bawipa) nangmah lawnglawng hi Pathian na si ti kha an hngalh naklai, amah kut chung hin kan khamh ko, tiah kan nawl,” tiah a ti. Credit: Tluang Hre
Leave a Reply