“Biakamnak Zulh Loin A Hrawktu” (By Ram Tinthei): Mipa a fimzer ngaingaimi le hmuhton experience tam ngai a ngeimipa pakhat a um. A min cu U Kawl an ti i, a pawcawmnak cu thanzu zuar asi. Nikhat cu zaangba ngai le lungre thei ngaiin a innpawng, a dum chung Thankung tangah khua a ruah lenmi cu hitihin asi.
“Thanzu zuar lawngte cun hawi ka tluk lailo, ral ka ngeih fawn caah keimah lawng khuasak ding cu ka ningti, riantuan le hawi bang ka thawnglo, ka inn zong hi a tet dih cang fawn i a thar in sakthan a hau, ka tefe hna zohkhenhtu sinum zong ka herh fawn, ka fa-ei hna zong nih an ka huat” tiin lukheuh in khua a ruat.
Cu khua a ruah len lio ahcun a innpawng i a fel emem mi pathum kha a hun ithei hna. Riantuanlo in ni zeimawzat chung a bih hna, a ngiat hna hnu ah a thluak chuah in biakhiahnak pakhat a ngeih. A innpawngkam i khua a sa vemi minung pathum cu a kawh zau hna i, rawl a dangh hna hnu ah amah he khuasakti dingin a lem hna.
Cu hna pathum cu hitihin bia a kamh hna; kan karlak i khammi dumhau vialte hi kan hrawh hna lai i hmunkau pakhat ah kan ser hna lai, inn mangtara in kan sak hna lai i cu cungah cun tlukruangte in khua kan sati hna lai, kan ngeihchiah vialte cu unau tingzo in kan ihrawm dih hna lai, unau chuakti bangin kan idaw hna lai. Cun ngai uh !!! nan huamlo tik poh ah inndang nan chuak than kho” a ti hna.
Cu biatiam cu a tha tiin an lukhun a tha ngaingai. Pakhat le pakhat an i zoh hna i, an lungtlin dom caah lunghmuih ngaiin hnatlaknak rawl an dum i, an ifonh ai. Min an thut i, khua an hun sakti kum 1 a tlin bak ah hitihin an ruahlo ningpi in thil a cang. Bia a rak kamhmi hna vialte cu thlitu nih a choihmi favai bang lak awk a umlo.
Amah le a fale cu bawi ah an cang i, a innpa hna pathum le an fale cu sal bangin a inntang ah ther lengmang in khua an sa. 1nak. A vorhlei kam i khua a sami pa Salai Lailek cu; sakah a thiammi le pa raltha ngai asi caah, ral an rat tik i a thawltu hna le a innka cawng, a innpi himnak zohkhenhtu (security) ah a hman.
2nak. A kehlei i khua a sami pa U Sai cu; dum tuah le theitlai cin a thiam, rawlchuan le coka lei rian a ti khawh ngai caah rawlchuangtu le dum thlotu ah a hman. 3nak. A chaklei i khua a sami pa L Jing cu; a rum ngaingai, suingun chawva leiin a ngeihchiah a that pah caah a innchung thilri zohkhenhtu le a rawkralmi remhtu ah a hman.
Khoi, tlukruangte in khua kan sa lai na ti pei, na biakam vialte cu tah an ti poh ah; an hmur a huh hna, hri in innkhan chungah ah a hren hna, rawl loin a chiah hna, ceilak a fungfek in a huai hna. Khua an sakti thawk in, nihin tiang an buai ko ti asi. Mah cucu an biakamnak ni cu, February 12, 1947 ah Shanram Panglong khua ah a rak cangmi asi. Mirang nih Panglong Agreement an ti.
Salai Laikek, U Sai, le L Jing cu tuni tiang lukheuh in khuaza an tuak, khuaci an mui, vava an tum ai. Credit: Ramtin Thei
Leave a Reply