September 2, tuchun ah Pu Bawi Lian Mang hruaimi Chin Human Right Organization (CHRO) riantuantu hna le US hrambunh President Jimmy Carter Center upa hna online tonbiaruahnak an ngei tiah theih a si.
CHRO Excutive Director Pu Bawi Lian Mang nih “Tu chun CHRO team le President Jimmy Carter Center ton biaruah nak kan ngei i ka lawm ngaingai. Kan ram cu Rai le Ral nih a kan den tikah kan van a sang, Pathian sin ah thla kan cam. Khuazei in dah himak lam kan hmuh khawh hnga timi kha mizei paoh nih kan si khawh tawk cio in tan kan la. US cozah hi Burma ram democracy le nuhrin covo kong ah hmaisuang in a tuanmi a si. Cozah nih direct in a tuahmi pinah International Republican Institute, National Democratic Institute ti bantuk le US President hlun pawl zongnih biatak te in Burma ram hi an sia a herh. Cu lak ah President Jimmy Carter Center hi vawlei pumpi huap in Rem nak le daihnak kong, vawlei mipi kan ngandamnak kong le a rawk cangmi ram hna nih ruahchannak thar he rian an tuan khawh thannak dingah kumkhat ah US $ billion pakhat ($ million thongkhat) hrawng hmang in rian a tuan mi a si. Tu chun ah Chin miphun hna le Burma ram ah zeitin dah kan luh khawh lai i rian kan tuan khawh ning a si lai timi kong ruah ti dingin an ka sawm i biaruahnak caan kan ngei kho” tiah a facebook cahmai ah a tial.
Tonnak ah ramri ah a ummi CHRO riantuantu Salai Za Uk Ling le Salai Van Biak Thang nih a hmun i thil sining kong online in fiang ngai in an chim i President Carter Center upa hna cu an i lunghmuih ngai.
Cun “Kan i ceihkhanmi kha Pathian nih thluachuah hram sehlaw theipar tha tlaiter hram seh. President Bush Center zong Burma ram kong ah mino hruaitu tampi training a pek ve hna. CHRO chung zongin minung 2 Bush Center ah training a kai balmi an um. Tutan ralhrang nih uknak hramhram in an lak hnuah Burma ram hmunkip ah mino cawlcanghnak fak ngai in a chuak. Cu cawlcangh nak i hruaitu dam deuh hi President Bush Center i Young Leadership training a kai mi deuh an si hna” tiah Pu Bawi Lian Mang nih cun a tial.
The Chin Post
Leave a Reply