RIP: RC Siangbawi (Father) Pakhat Nam Sawh A Tong I A Nunnak A Liam

Vienam ram ah Dominion Siangbawi pakhat cu sual thlahnak a tuahpiak hna lio (while hearing confessions) ah nam sawh a tong i a nunak a liam tiah theih a si. Nam sawh thah a tongmi siangbawipa a min cu Giuse (Joseph) Tran Ngoc Thanh, O.P ti a si. Amah hi kum 41 lawng a si rih i, Kon Tum khuapi he meng 40 hrawng a hlatnak Dak Mot mission field ah Pathian rian a tuanmi pakhat a si.

Nam sawh a tong ni cu 2022, January 29, zarhte ni zanlei sang, sual thlahnak a tuahpiak hna lio ah nam in an sawh I a nunnak a liam hi a si. Siangbawipa a thahtu a si lai tiah lunghrinhmi pakhat zong an tlaih cang tiah Kontum Diocese ngeihmi social media cahmai ah an tarlangh hi a si. A tlaitu palek nih an chimh ning cun “A thattu pa i ritthaisii a hmangmi a si” tiah an chim.

Father Giuse Joseph Tran Ngoc Thanh cu 1981 kum ah Ho Chi Minh khuapi ah a chuakmi a si. Source a simi Kontom Diocese lei nih an langhter ning ahcun Dominican Father Joseph Tran Ngoc Thanh cu Kon Tum Province, Sa Loong Subparish ah pastor bantukin a umpi hna lio ah nam sawh a tong hi a si i, nam in voi tampi an sawh” tiah a langhter.

Father Giuse Joseph Tran Ngoc Thanh ruah vuitu Kontum Bishop Aloisius Ngugen Hung Vi nih cun “Kan tonmi thil hi a fah ngai, nain aa dawh ko. Atu a thimi Father hi mi nih an dawt ngaimi a si, nain sualnak (evil) nih a controlled mi hna caah zaangfah ngai an si” tiah a chim. “Pathian khuakhannak hi kan thei kho lo, kan Father lawng hi Amah (Pathian) sin kan pek chanh khawh” ti zong in a chim chih.

Father Giuse Joseph Tran Ngoc Thanh cu Dominican member pakhat sinak ding ah 2010 kum ah biakamnak a tuah i, Father sinak hi 2018 kum ah a ngahmi a si. A ruak suannak program cu thah a tongni a thaizing January 30 ni ah Kon Tum khuapi i Dominican siangbawi sianginn nih a ngeihmi thlan hmun ah tuahpiak a si cang.

Nain vuinak program tu cu nihin January 31 ni ah, Bien Hoa i Sint Martin biakinn kulh chung i inn khan hme pakhat ah an tuah ti si. An thahnak a ruang hi media hna nih an langhter chihmi a um lo. Palek nih a chim ning cun a thahtu hi ritthaisii a hmangmi a si a ti i, ritthaisii nih a molhter ruangah a si kho men. Ref: Proud to be Catholic Christian, UCA News