February 6, 2022: Arakan ramkulh, Maungdaw myone chaklei Khamaungseik khua pawng ah kan hnu February 4 ni ah SAC ralhrang phu le Rahingya ralkap phu RSO (Rohingya Solidarity Organization) kar kahdohnak a chuak i SAC ralhrang phu lei in 8 an thi pinah tampi nih hliamhma an tuar tiah RSO lei in Bohmu Kyaw Myint Tun nih Lu Ngei Khit media ah a chim.
“Kawl ralkap Kha-Ma-Ya 352 phu he kan i kap. Ralveng kan vah lio ah kan i tong i kan i kap. Kanmah lei in minung pakhat hliamhma a tuar. SAC ralhrang phu lei in 8 an thi. 11 hliamhma an tuar” tiah Bohmu Kyaw Myint Tun nih a chim hi a si. Rohingya ralkap pawl cu Arakan ramkulh chung ah a ummi an si i, an thawngpang theih lonak a sau ngai cang.
Cu kahdohnak ah SAC ralhrang phu lei in AK-47 meithal zunkhat, M-16 meithal zun hnih, 40MM zun khat le meithal kuan tampi zong kan lak khawh tiah a video he social media in thawngthanhnak an tuah ti si. Rohingya Solidarity Organization (RSO) lei nih cun SAC ralhrang phu kan hmuhnak paoh le kan hmuh caan paoh ah kan doh peng hna lai tiah an chim.
Kan hnu February 4 ni thiamthiam ah Maungdaw myone, Mitaik khua pawng ah Arakan Army (AA) phu hmunhma an khuarnak area lei ah SAC ralhrang phu Kha-ma-ya 352 phu an phan ve i kaphnih kar kahdohnak a chuak ve. Cu kahdohnak ah AA ralkap pakhat zong a nunnak a liam ve tiah theih a si. Nain SAC ralhrang phu lei in a thimi an um ve nain a thimi zat theih khawh a si rih lo.
AA in chimhnak nawlngeitu U Khaing Thu Kha nih cun hi kahdohnak a um le um lo kong ah, SAC ralhrang phu an cawlhcanghnak ning kan zoh chih lai i, kan umnak hmunhma ah an cawlhcangnak le thazaang chap ti bantuk an tuah rih ko ahcun a herh ning in kan cawlcang ve cang lai tiah a chim. AA le SAC ralhrang phu hi an i kap lonak a sau ngai cangmi a si. Ref: LNK
Leave a Reply