SAC Ralhrang nih Falam Peng, Thlanrawn Khuathar ah inn 3 an Khangh Than

Nihin zinglei ah SAC ralhrang pawl cu Falam peng Thlanrawn Khuathar ah an phan i atu tiang ah inn 3 an khangh cang, tiah thawng kan theih.

Thlanrawn cu Rialti khua pawng ah a ummi a si. Rialti khua i inn 8 hrawng zong SAC nih mei in an khangh dih cang.

Khuachung minung tlaihmi an um le um lo theih a si rih lo. The Chin Journal

Relchap : Hakha lei Phorhmi Ar 450 Hakha-Monywa kar ah Mibu nih an Chuh Dih Hna

Hakha lei ah an rak phorhmi ar 450 cu nihin zaanlei sml. 5:00 hrawng ah khan Hakha le Monywa karlak, Monywa leikap Nagamok Tlang (နဂါးမောက်တောင်) zawn ah minung 100 hrawng a simi mibu nih an chuh dih hna, tiah ar chuh a tongmi Hakha khuasa chungkhar hna sin in thawng kan theih.

Nihin October 13 ah Monywa in ar a phor i Hakha ah a rak tlungmi motor cu Nagamok Tlang ah a rawk i, cuka hmun ah cun mibu nih an ar vialte hramhram in an chuh dih hna hi a si.

Ar chuh a tongmi chungkhar pakhat nih, “Monyaw in kan rak i thawh i Nagamok Tlang ah kan motor cu a rawk. Motor mongtu kan chiah ta i, a neih biknak hmun ah motor hlan ding in kan kee in kan va kal. Motor kan hlan khawh i kan rak kir ah cun kan ar bawm le kan ar cu minung 100 tluk nih an rak tthial dih cang,” tiah The Chin Journal ah a chim.

Ar tlawmpal lawng i lak ding in le ar bawm tal chiah ta ding in an nawl len hna nain an duh lo pin ah an tlerh khawn hna.

“Kan nawl len hna. Ar thlampal hi cu i lak ko u law kan chiahtak ko uh kan ti hna zong ah an duh lo. Cun, ar hi i lak uh law arbawm tu hi kan chiahtak ko uh kan ti hna zong ah an duh hlei lo. Ar he arbawm he an cawi dih i lamthlang lei ah an kalpi thluahmah ko. Na kan pek lo cun nan nun him lai lo zong a kan ti,” tiah a chim chap.

Ar an lakpiakmi hna hi 450 tluk a si i, ar paruk lawng an chiahpiak ta hna. Ar a chuttu mibu lak ah hin nu pawl zong an i tel.

Ar a chuttu hna minung 100 hrawng hi hriamnam le meithal zong an i ken lo i khuami sawhsawh zong an si kho, tiah an ruahdamh.

Nagamok Tlang hrawnghrang hi atu bantuk in firtlai le mithah tibantuk a rak um pah lengmangnak hmun a si. The Chin Journal