SAC Ralhrang Phu Nih An Kuttang Um BGF Ralkap 15 An Thah Than

SAC ralhrang phu nih Karenni ramkulh BGF sakhan cu a theih lo bantuk in aa umter i vanlawng in bomb an thlak tiah tlangtar in Delta News Agency nih a tarlangh. Thil sining cu, Kayah (Karenni) ramkulh le Thailand ramri Nanpan tiva pawng ah a ummi SAC ralhrang kuttang um Border Guard Force (BGF) 1005 Batallian Sakhan cu,

SAC ralhrang phu nih a theih lo bantukin vanlawng in bomb an thlak hnawhmi a hmutu an um tiah Karenni Army Kn. A. C nih tu zanlei ah thawngthanhnak an tuah hi a si. January 7 ni ah Nanpan tiva pawng ummi SAC ralhrang phu i Nattaung sakhan cu Karenni Army phu nih an lak hnu ah SAC ralhrang phu nih vanlawng in bomb kan thlak hnawh an tinak ah,

Anmah ralhrang phu security pawl umnak lila ah an thlak sual tiah Karenni Army phu nih thawngthanhnak an rak tuah bal. Nain Kahdohnak a dai hnu ah Karenni Army pawl nih hmunhma thianhnak an tuahnak ah SAC ralhrang phu nih security an tuannak ah bomb an thlak sualmi si loin Border Guard Force BGF 1005 Batallian sakhan cu hramhram in an thlak hnawhmi a si tiah theih a si.

Ralram hmai ah a kalmi Karenni Army phu pawl nih an hmuh tonmi ning ah SAC ralhrang phu nih helicopter in BGF 1005 sakhan bomb an thlak hnawh hna hnu ah pehzulh in hriamnam ngan voi tampi an kah rih hna tiah theih a si. SAC ralhrang phu nih anmah kuttang um BGF sakhan bomb an thlak hnawh hramhrammi ruangah BGF 1005 in tlawmbik 15 an thi tiah theih a si.

“Tu bantukin thawngthanhnak kan tuahmi hi Karenni Army nih BGF le SAC ralhrang phu iral hna seh ti duhnak siloin, mipi hna sin ah thil sining dik kan langhter duh ruangah hi thawngthanhnak kan tuahmi a si i, kanmah Karenni Army phu zong kan unau BGF phu hna a ngaihchiatnak kan hrawmpi ve hna” tiah Karenni Army phu nih fianternak an tuah chih.

SAC ralhrang phu nih Phuso myo, Moso khua ah sualnak ngeilo mipi 35 an nung in mei an khangh lio zong ah a thlauhtu BGF ralkap 4 zong an hnulei in an kut an tem i an lu ah an kah thah hna. Cucaah anmah SAC ralhrang lila nih in an kuttang um BGF phu pawl hi an rem lonak an langhter ngai cang. Karenni ramkulh ah BGF a ummi pawl hi anmah Karenni miphun deuh si dawh an si ve. Ref: DNA

Be the first to comment

Leave a Reply

Your email address will not be published.


*