Salai Ceu Bik Thawng nih tu lio Thantlang peng dirhmun kong a kan tial piak than. Harnak phen ah lunglawmhnak ti tlangtar in Kawlram chung a tuarbikmi Thantlang khuapi cu Thantlang CDF phu nih tam deuh an uk cang i, SAC ralhrang phu nih cun sang 2 te lawng an uk cang timi a langhter. Cu lawng siloin a bikin a langhtermi cu, Thantlang peng mipi caah thithruaitu bu a sernak kong a langhter chihmi hi a si. Atanglei he amah nih a tialmi cu a si.
CDF – Thantlang hruaitu pakhat nih a nih pah buin a ka chimmi cu, “SAC ralhrang phu nih Thantlang peng chung ah acre 10 hrawng lawng an uk kho. A tangmi vialte kanmah nih 100 ah 100 in kan uk ko” a ka ti. Thangtlang peng in acre 877,000 hrawng a kaumi pengkomh a si. Thantlang peng i 99% cu anmah CDF – Thantlang nih an uk dih ko tinak a si.
A si ko. SAC ralhrang phu nih Thantlang khuapi chung i sang sang 2 te lawng an uk hna. Khuapi chung i hmunhma (sang) tam deuh hmanh khi CDF le CNF nih an uk kho cang. Thantlang peng chung khuate 85 hrawng zong a zalennak hmunhma an si dih cang.
A rauh hlan ah Thantlang pengkomh ning in, 100 ah 100 a zalennak area an si dih te lai timi ruahchanhnak ka ngei. NUG vuanci pakhat nih ‘Myanmar ram pumpalulh chung ah a pakhatnak ah Thantlang peng khi zalennak hmunhma a si ahcun mah ka khin kanmah zung zong ka on lai hnga maw ka ti’ tiah capo biatak phun in a chim bal.
Atu zong CDF – Thantlang nih mipi uktu bu an ser i, mipi ca palek, upadi lei tuanvo latu le fimcawnnak, ngandamnak, ngunkhuai le a dangdang lei tuanvo latu ding zong buu an ser dih cang hna.
Khat lei in Spring Revolution ah a tuarbikmi khua cu Thantlang khua a si ko. Harnak phen in lunglawmhnak ah a thlumbik mi theipar tlai bantuk tlai hram seh ti hi ka thlacamnak a si. (Note: Kawl ca in a tialmi aa tlak ning in leh chinmi a si i, a cunglei Screenshot hmanthlak ah Kawlca in fian deuh in rel chih khawh a si.) Credit: Salai Ceu Bik Thawng
Leave a Reply