Salai Tluangte: Ramdang lawng hlah ee… Kan dothlennak kum thum chung kan hun lut cuahmah. Kan thazaang a hun thawng chin thluahmah. Teinak thantar (flag) rim a hun nam cuahmah, teinak thlizil nih a hun kan hranh cuahmah.
Dothlennak a hram thawk ka tein Ramdang nih nan rak kan dirhkamh (Chinmi mu). Lamzawh in hi dothlennak hi kan tei khawh lo ca ah mino siseh upa siseh tar siseh tampi nih hriam kan i tlaih cio.
Dothlennak hram aa thawk, mizapi lamzawh nakin kan chei hna lo. Hriam kan hun i tlaih, atu ah peng kip in khuahngak ralkap kan i ngeih cio. Hi vialte khuahngak ralkap lak ah CNA hi kan Cozah pi a si ti ning law ka palh lai lo.
Chim duhmi cu kum 3 chung kan dothlennak kan hun lut cuahmah, ramleeng chuak kan Chinmi thazaang deuh in kan thawng ti ning law ka palh lai ka zum lo. Biahalnak a um tawn mi cu, “Yiah… Ram leeng chuak lawng nan kan hnursuan, ram chung mi hna hi tah nan hnursuan ve hna lo maw?,” ti a si.
Ramleeng lei in hi zuamcawhnak bia a chuah hi ramchung laihlum zong nih kan i fahsak awk a si. Rambuai hnu ralzaam dirhmun in aummi an umnak hmun tam ngai ah ka va kal.
Annih nih cun, “Kan Chinland ralkap hna ca ah tiin minung pakhat nih Ks. 1000 (Thlakhat ca) tete khin tangka an i khon i thlafatin te an hruaitu hna nih thlacamnak he an va hlam (thla khat voi khat in).
Chim duhmi cu, ral a hrialmi kan si ko zong ah ramleeng lawng bochan loin ramchung zong nih kan tan a hau ve. Bianabia ah ralhrial minung 2000 um u sih, hi minung 2000 nih minung pakhat Ks. 1000 cio thawh usih.
Zeitluk indah a thathnem lai. Ramchung le ramleng tang ti ahcun zeitluk indah kan thawng hnga. Na mitthlam ah hei cuan terhmanh. A hei nuamh lai nihg le kan hei thawn lai ning hih.
Ramchung zong nih biatak in tawng ve hna sih, ramleeng zong nih biatak in tawng ve hna sih. Kan i bawmh ruaimai ahcun kan tei cuahmah bang kan tei chinchin rih lai. “Kan tei hrim lai, Kan tei cuahmah cang,” Ramchung he ramleeng he tang ti hna usih.
Na tangka Ks. 100 te zong dur chung ah rak rawn ve, kuan khat te na kan cawkpiak hmanh hi a sunglawi tuk kan i lawm tuk hringhran. Fighting kan tanpi rih uh. Photo/ Falam Peng, Nimzua (Dokthek) le Chuncung kar khanghmi ralhraang motor a si. Credit: Salai Tluangte
Leave a Reply