Ruahchuk,ruahcho 30: Mi Tampi Nih Thleidan Kan I Harh Ko Rua Timi: 1nak. Zirtian le Lungtluan: Zirtian timi cu mah ca thatnak lawng an tuak le anmah he ai kalhmi ruahnak an pom kho lo. Midang kehleng phelh kha an rian lian bik asi zungzal. Thil tha asi ti an hngalh ko hmanh ah anmah min langh lo ding siloah an ruahnak in a kal lo cun an cohlang duh lo.
Lungtluan timi cu anmah ca zong ah thil tha asi ahcun mizei poah he rian an tuan kho. Anmah caah rian an tuan bantukin midang ca zong an ruat. Mah minthatnak ding kha biapi ah an chia lo. Cung upa si kha an duhnak lian asi bel lo. Thiltha an tuahmi phozar kha thiltha chuahpi ding ruahchannak a um lo cun dai tein an liam ter ko.
E.g Laimi hi a pengtlang, phun/bu le khua hoih in riantuan asi tikah cheukhat nih cun kan covo a tum sual lai ti an phang le cucu biatek tein an doh tawn. Nain an chung a um vemi kha anmah he ai naihniam mi an si locun an hrangah tinek tia hmanh an siang fawn lo. Cheukhat tucu an si ve loh. Anmah minthat le hmuhnak pakhat lawng tuak in Buu/ phu kha hman an duh caah rian an tuan ve.
Min lianpi pi ken in riantuan an duh nain a chung tucu “Thlan” bantuk an si. Cheukhat tucu an chungah pekchanhnak leiah tlukruannak a um nain covo tucu a um ti lo caah inn dang an chuak tawn. Cu pawl cu an dirpi hna. Lam hruaikhawh le ahnu in dirkamh an i zuam. Riantuan ti tha an si ve than zau. A bu/ phu riantuannak ah pakhat le khat aza tawk in tlukruannak a hung um in cun cu ttefa tete pawl cu an i fonh than siloah rian an tuanti.
2nak. Virhkhoih le Dirhpi: Virhkhoih timi cu zirtian he ai dang tuk lo. Midang nih palhnak an tuahmi kha i remh hna seh timi lungput siloin an coihvirh le hma tu an por ter. Thennak le cheunak chuah ding in rian an tuan. Anmah kha a fim bik ah an i chia zungzal. Dirhpi lungput a neimi cu midang an palhnak le tlamtlin lonak kha zeiti telin an i remh kho hnga maw timi ruahnak (constructive ) he an chim an rel. Mipi sin chim ding le a thup in chim ding kha an thleidan khawh.
3nak. Thangthat le Tawzat: Mipakhat siloah phu rian tuannak ah thangthat awk a tlakmi cu thianghlim tein an thangthat. Cuti an thangthat tik hna ah an thangthatmi sinin ruahchannak a pel te hmanh an i pawi lo. Thangthat awk an that ti locun an kirtak ko hna. Mi cheukhat cu anmah duhning in thil kal seh ti an duh caah a herh lo tiangin mi an va chimthiam hna.
Cucu “Tawzat” kan ti. Kan lei ah tang hna seh tiin soilem cu a um ve nain cucu phun dang asi. A fian olnak ah: Tlangval siloah nungak nih mi kan helh tik hna ah kan thangthat hna siloah an taw kan zat hna. Cu ahcun ruahnak tha he asi ahcun mah nu/pa cu a lung kan lak hnu hmanh ah a cungah ruahnak tha lo an keng lo.
Zungzal hmunkhat ah har ton caan ah siseh lawmh caan ah siseh um ti dingin bia an i thleh. Cucu a thiangmi thangthatnak asi. Pakhat tucu cutin asi ve ti lo.Nungak/ tlangval kha an lung an lak hnu hna ahcun anmah ( a latu) ca hlawknak ding le nuamhnak ding lawng an ruat. A hnu ah an ca ah thathnemnak a nei tilo an ti si cun hnu an chiat ko hna.
Cucaah Dale Carnegie nih “How to win friends and influence people” timi a cauk ah, “Thangthat poah hi cohlan in Amen hlah ati. Puanzar phen ummi an lungput kha zoh khawh le hmuh khawh i zuam,” tiin an kan forh. Kawi Aung dohnak ah thahnem santlai asi hnga maw tiah ka hei ruatchuk, cho ko hme hi. Credit: CN Kam
Leave a Reply