September 18 zaan Hakha ah inn 2 a kaang, Drone bomb in kangh dawh si

September 18 zaan Hakha ah inn 2 a kaang, Drone bomb in kangh dawh si

September 18 zaan 9:00 PM hrawng ah Hakha khua Pu Lian Thang inn le a pawngkam inn tiin inn 2 a kaang, Drone nih bomb a thlak theo lai tiah zumh a si.

“Zaanlai 12:00 dengmang tiang mei kan phalh nain meitil a nung rih mi a um i nihin September 19 zing ah meitil cu kan thah than. A kaang mi hi inn 2 a si ko. Sayamagyi Hrang Kip Men (tleicia) te inn hi a tlaih luklak ve nain kan phalh manh. Zeitin kangh hram aa thok kan thei lo i thilri zeizat man dah a ciam ti zong kan tuak kholo,” tiah min langhter lo mi pakhat nih The Hakha Times ah a chim.

Hi kong ah khuami cheukhat nih, “Hakha khua cung ah drone aw thang ngai in aa thei. Drone sawhsawh si loin bomb puahnak ah hman mi drone phun a si ko lai dah. A thawng hi Sangkip ti awk in kan theih. Cu tlawmpal ah puahkehnak a chuak i atu bantuk in inn kangh aa thok hi a si. Zeiruang ah ti le aho nih ti cu a fiang lo nain SAC ralkap kut cu a si ko,” tiah The Hakha Times ah an zumh ning an chim cio.

September 18 zaan Hakha inn a kangh hlan zaanlei in Thantlang Sianginn Sang zong ah SAC ralkap nih a hleihluat in hriam an hman ruang ah pumpak inn 18 le Hotel dot 3 a ciam.

Meiphalh kal aa thawh mi Pastor Cung Biak Hum @ Biak Kolh zong SAC ralkap nih an kahthah pin ah a phone, suimilaam le a kutdong tan in sui kutdonghrolh an lakpiak tiah kan theih.

The Hakha Time