Shwebo peng ah khuami minung 8 thah an tong, Pyo Saw Htee kut in a si tiah tualchung mi nih an chim

Sagaing ramthen, Shwebo peng, Kyayay khua ah khuami minung pariat thah an tong i, Pyo Saw Htee kut in a si tiah tualchung mi nih Yangon Khit Thit Media ah an chim.

December 9 ah Shwebo peng, Kyayay khua mi minung pariat hna cu min hngalh lo mi phu pakhat nih an thah hna tiah tualchung mi sin in kan theih.

“Mahka khua lei hna hi cu NLD party lei tang khua an si. Kyayay khua zong hi NLD tanh mi khua an si ve. Thah a tong mi hi khuami an si. PDF an si tiin thah mi zong an si lo. Pyo Saw Htee an si ko lai. Nai hrawng cu Pyo Saw Htee pawl meithal he motor cycle in an vaak lengmang,” tiah tualchung mi pakhat nih a chim.

Thah a tong mi khuami hna cu: U Myint (Kum 67), Ko Aung Khaing (27), Ko Kyaw Htet Aung (16), Ko Aung Myo Naing(27), Ko Zin Min Htet (17), Ko Myo Myint (20), Ko Zaw Htet Aung (19) le Ko Pyih Phyu Thu (17) hna an si tiah kan theih.

The Hakha Post