Mandalay, Kyaukse university pawng Tawma khua ah Taluk Gas pipeline a veng lio mi ralhrangbu cu May ni 5 zing suimilam 5 hrawng ah a ho ti theih lo mi cheukhat nih nam he an va tuk hna i ralhrangbu pa 3 an thi colh tiah thei a si.
A tangmi ralhrangbu hna cu meithal an puah i an tli, mah thil a can hnuah Tawma khua chung ah ralhrangbu motor cu tawr le cheng an rak lut, kaakip an kawl tiah khuami sin in theih a si.
Tawma khua i Dalan pawl zong ralhrang pawl nih “Hi thil an ti khawh mi hi zeiruangah nan theih lo tiah an hro, fung he an tuk hna” tiah mit in a hmuh mi nih an chim.
Cu lawng si lo, Tawma khua (ပညာနန္းေတာ္) Tution Saya U Myo Min Taw inn cu an va kal hnawh, a inn zong an hrawh piak, thilri zong an fir piak tiah theih a si. “Saya belte cu a luat. Kan hmuh a si ahcun kan kah/thah colh lai tiah an hro chih” tiah khuami nih an chim.
Tu zinglei suimilam 11 tiang khuachungah meithal an puah rih. Kyaukse University compound i Non CDM Saya/sayamah pawl he riantuan pawl zong meithal puah thawng ruangah an ttih ngai tiah theih a si.
Gas pipeline he ralhrang nunnak a cawm lio mi Saya/Sayamah le cozah riantuan pawl an nunnak cu tuanvo kan la lo tiah nai hrawngah khan Kyaukse District Defence Force (KDDF) nih an pek tiah theih a si.
The Chin Post
Leave a Reply