Thah An Duh Ngaimi MP Hlun Pakhat An Thah Khawh Cang

February 3, 2022: Thah An Duh Ngaimi MP Hlun Pakhat An Thah Khawh Cang: Ayeyarwaddy ramthen, Kyaiklat myone, Nyaungpinsu khuami Rose Party MP hlun U Hla Thaung cu nizan February 2 zan ah meithal in an kah thah tiah Ayeyarwaddy Dolphin phu nih thwngthanhnak an tuah.

A thimi U Hla Thaung cu sualnak ngeilo mipi hna kha PDF tiah hramhram in a ti hna i SAC ralhrang phu a tlaihter hna, a velhter tawn hna tiah khuaminih Ayeyarwaddy Dolphin phu sin ah report an tuah caah Ayeyarwaddy Dolphin phu nih kherhhlainak an tuah tiah thawngthanhnak an tuahmi an langhter chih.

Ayeyarwaddy Dolphin phu nih U Hla Thaung timi pa cu tha tein an kherhhlai i mipi cung ah namneknak a ngei i a sual ko timi fian tein an hmuh hnu ah Ayeyar Vedic phu he fonh in an thianhmi (an thahmi) a si tiah Ayeyarwaddy Dolphin phu nih thawngthanhnak an tuah hi a si.

Cu bantuk in sualnak ngeilo mipi cungah namnek in aa bawiter tukmi pawl, mipi harnak a petu paohpaoh cu aho an si zong ah Dohthlennak tuahtu mipi ralkap nih pehzulh in kan thianh (kan thah) hna lai tiah theihternak le ralrin peknak zong an tuah chih ti si.

Dohthlennak tuahtu mipi ralkap phu (Revolutionary forces) hna nih Dalan an thianh (thah) hna ah mipi tlaih le khih, kah le thah an tong nakhnga lo, SAC ralhrang phu he aa komhmi hna he naihniam in um lo ding in Ayeyarwaddy Dolphin phu nih ralrin peknak zong an tuah ti si.

Kan hnu 2021 kum, December 24 ni zong ah SAC ralhrang he fonh in tilawng ngeitu hna sin in hramhram in phaisa a kholhtu, mipi pawl a kutdong in a sawh hna i a tlaihtertu, Kyunmangei myo in Dalan ngan taktak tiah ruahmi Wai Yan timi pa cu Ayeyarwaddy Dolphi phu nih an rak thah cang hna tiah theih a si. Ref: LNK