Thai cozah soisel ruangah Thai Miss pakhat le Miss zuamnak tawlreltu cu tazacuai an tong Ramkip Miss hna cu miss zuam cawnnak center pakhat tawlrel piak tu Thai ram minthang director Nawat le Thai Miss pakhat nih prime minister Parayuat hruaimi Thai cozah cu Facebook in soisel nak an tuah caah taza cuai an tong.
Thai ram ah Covid-19 zawtnak chawnh ning a karhtuk nak a ruang hi Thai cozah nih tawlrel nak thazaang a der caah a si, Thai prime minister Payayuat i a cozah hna nih business lei ah thazaang an pek deuh caah mirum mi hna cu an rum chin i, sifak harsa hna cu sifak chin le harsa chin in an um, Covid-19 zawtnak ngeimi mipi hna cu cozah nih tha te in zohkhenhnak le thlopbul nak tuah lo in Covid-19 runvennak sii za lak in a tawlrel khawh lo mi kong cu Mister Nawat nih a Facebook ah live thlah in soisel nak a chim.
Mister Nawat cu Covid-19 zawtnak ngei ve mi pakhat a si i, cozah sizung ah thlopbul in a cawngh lio ah a luancia mi July thla ah khan sizung mi hna he buai nak an tong.
Sizung ah mizaw an tamtuk caah, a zualdeuh mi mizaw tu sizung ah um ter in, a dam deuh mi hna cu nikhat chungah sizung in chuahter ding ah sibawi te nih bia an cah hna, Miss Nawat cu oxygen dawp bu in le zun thlor bu in live a thlah i, cozah siinn cu a soisel hnu nikhat a luan ah cozah sizung ah tum in a leng sizung ah a zohkhenh than.
Cu hlan zong ah Thai cozah cu soisel ruangah May 29 ah Thai cozah vuanci zung hna i phungning in sualphawt mi phunthum in hmalak ding ah a tazacuainak an tuah.
COVID-19 zawtnak ruang ah prime minister le cozah , ngandamnak lei riantuan tu hna zong tha ba le lung rethei in riantuan cuahmah a si lio ah mister Nawat nih atu bantuki sualphawt le soisel nak a tuah mi hi cozah cung ah zumhnak a zor ter i mipi hna lungthin ah lunghrinhnak a chuahter tiah Naing Sontriria nih a chim.
Nawat nih dirhmi Miss Grand Thailand 2020 Thai Miss Namhphatyaphun zong nih cozah cu sualphawt in a soisel caah cozah sihni nih taza cuai nak a tuah.
Miss Namh nih cun a mah cu mipi chung in mipi pakhat a si ve caah, a khuaruah mi cu zalong ten langhter mi a si nak kong, cozah cung soisel nak zong ah a dik mi a si ko nak kong le amah lei in palhnak a um lo nak kong ,sualnak ngei lo mi thongthlak ding an ti si le thongchung ah ka tla ngam ko tiah thawngzamh tu hna sin ah a chim.
The Chin Post
Leave a Reply