Thantlang Kahdohnak Update Le Thahtun Kahdohnak Ah Kumkhat Chung A Thimi Ralhrang Zat

Chin ramkulh, Thantlang khuapi ah nizan February 1 ni ah SAC ralhrang phu le Chin National Army le CDF Thantlang phufonh kar khuapi chung kahdohnak a chuak i SAC ralhrang phu lei in 5 an thi i minung 1 nih hliamhma a tuar tiah theih a si. SAC ralhrang phu lei nih hriamnam ngan an kah mi le Drone in bomb an thlak mi ruangah kahdohnak aa thawkmi a si i,

CNA, CDF ralkap phu fonh lei in hliamhma tuar an um hraw lo tiah theih a si. SAC ralhrang phu nih hriamnam ngan an kahmi ruangah a khenhmi Thantlang inn cheukhat a kang tiah CDF Thantlang lei in cathanh an chuahmi ning in theih a si. Thantlang Placement Affairs Committee -IDPs help nih thawngthanhnak an tuahmi ning cun,

January 30-31 le February 1 ni, hi ni 3 chung ah Thantlang khua chung ah ralhrang hna kut in, inn 94 khangh than ti si. Hi a kang mi chung ah hin Holiness Biakinn le Quarter hna ai tel i a kang mi cazin tha tein an langhter dih fawn. Nizan February 1 ni Thantlang kahdohnak ah Chin ralkap phufonh nih inn khangh hmang ralhrang 5 an thah khawh i, 1 ceilak in an hliamh hi a si.

Cu bantuk in Min Aung Hlaing hruaimi Uico rual nih hramhram in nawlngeihnak an lak hnu kum 1 cung ah Thaton People’s Guerillas (TPG) phu cu Karen National Liberation Army (KNLA) he fonh in voi 20 leng ralhrang an dohnak ah SAC ralhrang le BGF phu chungtel 47 an thah i, 23 an hliamhnak kong thawngthanhnak an tuah ve.

Cu vialte kahdohnak chungah anmah Thaton People’s Guerillas lei in pasaltha 2 nih ram le miphun caah an nunnak an pe ve ti si. TPG le KNLA phu fonh le SAC ralhrang phu kar kahdohnak voi 20 leng, a dang dohnak voi 9 le Min Aung Hlaing chungkhar ngeihmi Mytel tower tung 1 an hrawknak pawl an langhter pinah SAC ralhrang phu lei a thimi cazin hi,

Anmah nih an fehter khawhmi zong a si i, hinak tam an thi kho tiah an langhter. Hriamnan lei in pisto pakhat kan lak khawh tiah Thaton People’s Guerillas phu nih thawngthanhnak an tuah hi a si. TPG ralkap pasaltha Hman Gyi le pasaltha Nay Nyo Aung hna nih Federal Democracy kan hmuh khawhnak hnga le hramhram uknak kan hrawk khawhnak hnga,

Ral an dohnak ah ram le miphun ca an nunnak an pek tiah an langhter hi a si. Hi hi myone pakhat lawng nih a raldohnak kong thawngthanhnak an tuahmi a si. Ref; KTM