Saisih chuak lam kan ti lengmang mi Thantlang in, Thlualam, Hmunlipi, Hriangkhan, Thau, Bungtlang+Sialam ram in Bawinu (Tipi) ah a chuak mi lam a si. Saisih chuak lam hi a hlan ahcun “Saisih Chuak Camp” lam ti a rak si. Saisih va hi Sialam ram chung, an khua pawng tein tihna a si I a athawk mi va a si i a va luang i Bungtlang he an ramri tiva ah a va chuah i Bawinu (tipi) ah ava chuak.
Hi Saisih chuak tiah min pek mi hi min sawhsawh a si lo, mirang uk lio tein le mirang theih pinak tein rak pek mi min a si.Mirang uk lio ah Chin mi hna cu India ram um mi le khuachak (Burma) ram um mi chin tiin kan rak i then. Hi lio caan ah Kawlram pi le India cu Mirang nih a rak kan uk. cu tik ah khuachak ram um chin mi le khuathlang (india) ram um chin mi hna hi taza an rak i cuai lengmang caah ramri ah biacaih piak kan rak si.
India ram ah biacaih le Burma ram ah biacaih kha kan rak duh veve lo caah India le kawlram ramri atu Saisihcuak bawinu va (tipi) ah khin biacaihnak camp an rak ser. Cu Camp cu Sialam mi nih an rak sak. Cu lio ahcun Saisihchuak lam ti si loin “Saisihchuak Camp lam” ti a rak si.
Khi Saisih chuak cu Bungtlang le Sialam ramri ah a chuak mi a si. Cu ti cun lam zong an rak cawh i caan saupi rak zulh a si piin ah India le Burma ram kan i tlawnnak lam pi a si.Saisichuak timi min hi auh sawhsawh mi a si lo, sullam ngeite in le a lam le sul um tu ning bak in pek mi min a si.
Atu Saisihchuak lam an cawh mi cu Saisihva chuak, a hlan saisih chuak kan ti mi zawn ah a chuak ti lo. thlang lei atu zaisihchuak kan timi in meeng 5 tluk a hlatnak bungtlang khuataw ah saisihlam an chuahter cang. Cucu saisihcuak lam ti awk a tha bak lo.
Asullam le sining he aa kalh cang. Cucaah Saisih chuak lam si ti lo in “Bungtlang khuataw chuak lam” ti bak a hau mi a si. asilo ah min thar hmanh pek ding a si. Laimi nih ramin le thilri a si ah minung min kan sak tik poh ah sak hnawh chan a ngei dih. asinain atu saisichuak lam an timi le Mirang chan min ngei mi Saisih chuak lam cu aa dang tuk cang.
Cucaah Atu kan zulh ding mi Saisihchuak lam thar cawh mi hi Saisihchuak lam cu a si kho bak lo. Hi lamthar na zulh peng ahcun Saisichuak timi na chuak kho in na khen kho lai lo. Bungtlang khuataw tu na chuak lai. a sullam cu Saisihcuak lam a si ti lo caah a si. Mirang chan in min ngei mi lam le sullam a tlau cuahmah ti khawh a si.
Zei ruang ahdah hi Saisihcuak lam hi an thial hnga ti mi kan hlat tik ah Saisihva chuahnak zawn tipi va hi a ngan tuk caah hleidawnh a har deuh lai, budget a dih tuk lai tiah an chim ka theih. ruah awk a um mi cu, Cozah caah a har mi rian aum lo. India ram, Mizoram cozah zong nih ni nikhat cu hi Saisichuak lam in Burma ram he kan i pehtlaihnak lampi a sit e ti an rak hngalh cang caah tuan pi in Sangau in Pangkhua, pangkhua in Tipi a tu Saisihchuak tiang bak motor lam pi an rak cawh diam cang.
Asinain Bawinu va hleidawnh nak ah a dih mi tnagka atlawm deuh lai Bungtlang khuataw lei pi ah an mer. Hi tluk Thantalgn peng ah tuanbia ngei lam pi le mirang theih pimi lam le sullam ngei mi lam hna kan Cozah nih atu bantuk in an kaltak i lamdang in an mer tik ah Saisih chuak lam tuanbia tlau he aa khat ti khawh a si. Cu lawng hlah a hlei dawnhnak ding caah Cozah tangka a dih mi cu atlawm lai nain lamzultu ding mipi lamcaan a hei sau ve lai ning kha cozah nih an tuak ve ti lo.
Ahlan saisihchuak in meeng 5 tluk a hlatnak thlanglei ah an chuahter tik ah Pangkhua lei zong in mee 5 tluk a hlatnak thlang ah a va chuak ve i a dih lak meng 10 tluk bak mipi nih lam hlei kan zulh cang lai. hihi tha tein kan cozah nih a tuak ve hnga maw? By Rolian;Laknak;Thei Voice Of Democracy
Leave a Reply