Thawngthar: AA Nih Min Aung Hlaing Uico Ralkap Tam Tak An Thah

February 7, 2022: AA Nih Min Aung Hlaing Uico Ralkap Tam Tak An Thah: Maungdaw ah SAC ralhrang phu nih raldoh ding an ra caah kahdohnak a chuak tiah AA in chimhnak nawlngeitu nih Khaing Thu Kha nih a chim. Thil sining cu Arakan ramkulh, Maungdaw myone ah kan hnu February 4 ni in 6 tiang kahdohnak a chuak mi cu,

SAC ralhrang phu nih offensive in an rat ra caah a chuakmi a si tiah Arakan Army AA in chimhnak nawlngeitu Khaing Thu Kha nih a chim hi a si. Nizan February 6 ni ah SAC ralhrang phu nih an rak kan ra hnawh i kahdohnak a chuak, SAC ralhrang phu nihhin AA nih kan ukmi Lehpan Taungcaw chuh khawh ding an i zuam tiah Khaing Thu Kha nih a chim.

“February 6, chun suimilam 3 in zanlei suimilam 6:15pm tiang, suimilam caan 3 leng chung kahdohnak a chuak. Kahdohnak a umnak hmun hi Maungdaw myone, Mitan khua in nichuak-chak lei, kilometer 3 le cheu hrawng a hlatnak Lehpan Taungcaw lei ah Kawl ralkap nih Offensive in doh an kan timh than caah kaphnih kar kahdohnak a chuak hi a si.”

“Abiapi in cun, February 4 ni kahdohnak a chuaknak Lehpan Taungcaw ah Kawl ralkap nih rak kai than an i timh caah a si. Nihin (February 6) kahdohnak ah a thimi an um le um lo ka thei rih lo. Kawl ralkap lei in a thimi an um kho” tiah AA spokesperson U Khaing Thu Kha nih Yangon Khit Thit Media ah a chim hi a si.

Arakan Local media source pakhat a simi nih a langhter ning ahcun Maugdaw siizung ah palek 2 ruak le ralkap 7 ruak pawl February 6 ni zanlei sang ah an rak phan tiah theih a si. Cucaah Khit Thit Media zong nih SAC ralhrang lei in 9 an thi tiah a tarlangh ve. Arakan ramkulh, chaklei Maungdaw myone chung thiam ah, February 4 ni ahkhan, RSO le SAC ralhrang phu kar kahdohnak a chuak ve i, ralhrang lei 7 hrawng an thi ve. Ref: KTM

Thawngpangdang rel chap ding: Nu 3 An Ruak In Hmuh A Si: Launglun ah Pyosawhti phu nih an thahmi nu 3 an ruak in hmuh a si. Thil sining cu Tanithary ramthen, Nyinmaw khua pawng ah kan hnu February 5 ni, chun suimilam 12 hrawng ah SAC ralhrang kuttang ummi Pyosawhti phu nih an thahmi Sit-phae khua le Laytunkhan khuami,

Nu 3 hna an ruak hmuh a si tiah khuami hna chimhmi chirhchan in Yangon Khit Thit Media nih a tarlangh. Cu pyosawhti phu nih an thahmi nu 3 hna cu a luancia ni tlawmpal chung ah an thahmi a si i, an ruak an hmuh ahhin a thu nam ngai cang i, an muihmai zong an rawk dih cang tiah khuami nih an chim.

“Nizan kha an ruak umnak pawng ah minung an kal i a thu rim an theih caah kan va zoh i mithi ruak kan hmuh. Kan khua i, chiat-that bawmhtu buu bawmhnak kan hal i, an ruak kan chuak than tikah, Nyinmaw khua le Sit-pyae khua in chiat-that buu ibawmh in an ruak cu tha tein an vui than” tiah khuami pakhat nih a chim hi a si.

Cu mithi ruak 3 an hmuhnak kong cu cu area chung tuanvo ngeitu Kawl ralkap le palek sin theihternak an tuah nain rat in kherhhlainak an tuahmi a um lo i, security caah duty kan tuan lio a si i, cu bantuk kong (mithi ruak kong) ah caan kan pe kho lo tiah lehnak an tuah tiah khuami hna sin in theih a si. Ref: KTM