Nizaan ah an nuva in CDM a tuah mi hna chungkhar i an harhnak le hmailei ca an thinphannak facebook cahmai ah a hun kai ngai. CDM a tuah mi hna nih an harsatnak an chim tik ah micheu nih cun, “Nunnak a thap mi CDF hmanh an um lio ah mah tehna chim cu Laifa a si mi nih lo zong tah nan tuah cio. Rian zong tah nan țuan cio,” ti hna an vun denchih hna. An harnak pin ah an lungzornak aa chapchin.
CDM hi an thisen chuak in ral an do lo nain an chungkhar dihlak sining a thaap mi an si ve ti hi kan hmuhpiak hna awk a si. CDF he tahchunh in kan namneh hna awk a si hrimhrim lo. Anmah sining dihlak nih a phak tiang an tuah mi si ti philhpiak hna hlah usih.
CDF, CDM tuah pin ah atu pulrai aa thuat tik ah ramleng um mi zong an rethei ngaingai. Anmah lawng rinh awk an țha lo. Laihlum um mi vialte i kan rian zong a si ve. A kan vengtu CDF kan dawt hna bantuk in an sining a thaap mi CDM a tuah mi chungkhar hna zong dawt philh hna hlah usih. An harsatnak hrawmpi hna usih. Khua khat cio ah a um mi CDM a tuah mi milu an tam lo. Khua khat cio in kan pawng i a um mi CDM hna an hnu in kan dirpi hna i an harnak kan hrawmpi hna ahcun an khuaruah a awng deuh lai. Kan hnu ah mizapi an dir tak ko tiin an ral a țha deuh lai. Hmaisuang ah a dir ve mi kan CDMers pawl an lung a dongh lo ding hi Laihlum mizapi kan rian a si ve ti philh hna hlah usih.
Pulrai le ral kut chung in kan him khawh nakhnga pakhat le pakhat i dirpi in i zohkhenh hna usih! Kan ral kan tei tiang kan tai fek tein i rek rih cio ko hna usih! Pathian sin thla cam buin kan ral do rih hna usih! Kan tei hlan lo dohți hna usih!
“Ralkap uknak kan tei lai, pulrai in kan i veng lai.”
The Chin Post
Leave a Reply