Nihin (June 10) zinglei ah Thantlang peng, Khualhringtlang chung i Mualkai khua le Tihbual khua karlak ah CDF le SAC ralhrang kahdohnak a chuak i atu tiang ah SAC ralhrang 6 an thi cang, tiah thawng kan theih.
“Atu tiang ah fiang in kan theih khawhmi ah ralkap 6 ah thi cang. CDF lei tu cun hliam a pumi an um le um lo fiang in kan thei rih lo. Anmah zong nih official in thawng an chuah te lai,” tiah upa pakhat nih The Chin Journal ah a chim.
“A chelcaan ah kahdohnak tlawmpal an dai i a ruah hlan ah an i kap tthan. Atu hi a daih liote a si. I kahnak zei can a rauh lai timi fiang in chim khawh a si lo,” tiah a chim chap.
Nihin zinglei kahdohnak a chuah hnu in Vanzangtlang lei in SAC ralhrang cheukhat Lava lei ah an ttummi khuami nih an hmuh hna.
June 8 ah khan Khualhringtlang, Hmunthar khua ah SAC ralhrang 50 hrawng an phan i, June 9 ah Vanzangtlang, Sopum khua ah SAC ralhrang 100 hrawng an phan ve.
The Chin Journal
Leave a Reply